ფოთის მერობის კანდიდატმა, გიგი უგულავამ განაცხადა, რომ მხარს უჭერს ნიკა მელიას განცხადებას, შეუერთდეს შარლ მიშელის დოკუმენტს. ამის შესახებ მან ფორმულას ეთერში ისაუბრა.

"სრულიად სოლიდარული ვარ და მხარს ვუჭერ ნიკა მელიას განცხადებას, რომ ის შეუერთდა შარლ მიშელის დოკუმენტს, სრულიად სოლიდარული ვარ და მეც ვიმეორებ იმ მოწოდებას, რომ შემოხაზეთ, მეგობრებო, ნებისმიერი, ნებისმიერი, ხაზს ვუსვამ, 41 ნომრის გარდა", — განაცხადა უგულავამ.

მისი თქმით, ენმ-ს გადაწყვეტილების შემდეგ, "ოცნების" კისერზე "პოლიტიკური ყულფი" კიდევ უფრო მკვრივი გახდება და 2 ოქტომბერს ქვეყნის სხეულზე "კიბოს მეტასტაზებივით მოდებული სარეველა" ამოიძირკვება.

"ქართული ოცნების კისერზე პოლიტიკური ყულფი სულ უფრო და უფრო მჭიდრო ხდება, რა თქმა უნდა, ენმ-ის გადაწყვეტილების შემდეგ, შეუერთდეს შარლ მიშელის დოკუმენტს, ეს ყულფი მათ კისერზე კიდევ უფრო მკვრივი გახდება და საბოლოო ჯამში მოხდება 2 ოქტომბერს რეფერენდუმზე ქართული ოცნების, როგორც ანტისახელმწიფოებრივი, აბსოლუტურად, თავიდან ბოლომდე ოლიგარქიული, მეტასტაზი, კიბოს მეტასტაზივით საქართველოს სახელმწიფოს სხეულზე მოდებული სარეველას ამოძირკვა.

დიახ, ამ სიტყვებს ვხმარობ იმიტომ, რომ ჩვენ დღეს ვცხოვრობთ მიტაცებულ სახელმწიფოში, ჩვენ დღეს ვცხოვრობთ ოლიგარქიულ სახელმწიფოში, სადაც ოლიგარქმა შვა პატარა ოლიგარქები და ამის სიმწარეს ყველაზე მეტად აქ, ფოთში ვგრძნობთ, ქალაქში, რომელიც სატუმბივით არის. აქედან ტუმბავენ ფულს და კაპიკს არ აბრუნებენ, გროშებს აბრუნებენ აქ ამიტომ ეს სისტემა უნდა შეიცვალოს და, რა თქმა უნდა, პირველი მერცხალი იქნება ის, რომ 2 ოქტომბერს დასრულდება და გაფორმდება მარცხი", — თქვა უგულავამ

ნიკა მელიას განცხადებით, ნაციონალური მოძრაობა შარლ მიშელის ხელშეკრულებას ხელს მოაწერს. მისივე თქმით, ევროკავშირის მაკროფინანსური დახმარებაზე უარის თქმა და ქართული ოცნების ბოლო განცხადებები არის ღია პოლიტიკური განაცხადი საგარეო პოლიტიკური კურსის ცვლილებაზე და სწორედ ეს გახდა მათთვის ბიძგი, რომ შეთანხმებისთვის ხელი მოეწერათ. მელიამ აღნიშნა, რომ ეს ნაბიჯი კიდევ უფრო დააახლოებს და შეკრავს ყველას, ვისთვისაც ძვირფასია საქართველოს ევროპული მომავალი.