31 აგვისტოს მდგომარეობით, პარლამენტის თანამშრომელთა 70% აცრილია და პროცესი მიმდინარეობს. ამის შესახებ განცხადება პარლამენტის თავმჯდომარემ ბიუროს დღევანდელ სხდომაზე გააკეთა.

"კიდევ ერთხელ მოვუწოდებ ყველას, დაიცვან რეკომენდაციები. ვაქცინაცია უმნიშვნელოვანესია. პარლამენტის თანამშრომელთა 70%-მდე აცრილია და პროცესი მიმდინარეობს. იმედია, მალე სრულად იქნება ვაქცინირებული. არ შემიძლია, მადლობა არ ვუთხრა ჩვენს გმირ ექიმებს, რომლებიც განსაკუთრებით მძიმე ივლისი და აგვისტო გადაიტანეს", — ამბობს კახა კუჭავა.

31 აგვისტოს მონაცემებით, საქართველოში კორონავირუსის 4 778 ახალი შემთხვევა დადასტურდა, გამოჯანმრთელდა 4 753, ხოლო გარდაიცვალა — 79 ადამიანი. მხოლოდ აგვისტოში კორონავირუსი საქართველოში 130 377 ადამიანს დაუდასტურდა, ხოლო გარდაიცვალა 1 588 ადამიანი.