გირჩი — მეტი თავისუფლების ლიდერის, ზურაბ ჯაფარიძის განცხადებით, ქართულმა ოცნებამ ევროკავშირს "დაასწრო" და თავად თქვა უარი დახმარების მიღებაზე. ის მმართველ პარტიას "უტიფარ ვირეშმაკებს" უწოდებს. ასე ეხმაურება ჯაფარიძე პრემიერმინისტრს, ირაკლი ღარიბაშვილს, რომელმაც თქვა, რომ ევროკავშირის მაკროსაფინანსო დახმარების მეორე ნაწილის აღებისგან თავის შეკავება გადაწყვიტეს.

"ეს ტრანში ფინანსური თვალსაზრისით დიდს არაფერ ნიშნავს, მაგრამ ევროკავშირის მხრიდან ამ ტრანშის მოცემაზე უარის თქმა მნიშვნელოვანი პოლიტიკური გზავნილი იქნებოდა. ამიტომ რა ქნა ოცნებამ? დაასწრო და იქით თქვა უარი ამ ფულის მიღებაზე, ვალის შემცირება დავიწყეთო (რა შემცირება, შარშან 7,5 მილიარდი ახალი ვალი აიკიდეს, ოღონდ არჩევნები არ წაეგოთ) პრიმიტიული, მაგრამ უტიფარი ვირეშმაკები არიან", — წერს ის.

ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მიკროსაფინანსო დახმარებას "ფინანსური დატვირთვა აღარ აქვს". ასე უპასუხა ირაკლი კობახიძემ პალიტრანიუსის ეთერში ჟურნალისტის შეკითხვას, მიდის ქართული ოცნება იმაზე, რომ საქართველო ევროკავშირის მხრიდან მაკროსაფინანსო დახმარებას არ მიიღებს.

24 აგვისტოს, პრემიერ ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".