მსოფლიო პატრიარქი ბართლომე მიიჩნევს, რომ კორონავირუსის საწინააღმდეგო აცრის შიში "სრულად აბსურდული და უსამართლოა" და ყველას აცრისკენ მოუწოდებს.

"კიდევ ერთხელ მოვუწოდებ ყველას, რომ აიცრან, რათა თავიდან იქნას აცილებული სერიოზული საფრთხეები, რაც მათ სიკვდილამდე მიიყვანს. ჩვენ, როგორც ეკლესია, როგორც რელიგია, განსაკუთრებით მსოფლიო საპატრიარქო, პატივს ვცემთ მეცნიერებას, მეცნიერების წარმომადგენლებს, მეცნიერების აღმოჩენებსა და მათ ჩვენს ცხოვრებას ვუსაბამებთ", — განაცხადა პატრიარქმა ბართლომემ MEGA-სთან ინტერვიუში.

მისივე თქმით, ისინი, ვინც პანდემიას უარყოფს და ვაქცინაციას ეწინააღმდეგება, "სწორად და ლოგიკურად არ ფიქრობენ".

"ისინი უსამართლოდ ექცევიან საკუთარ თავს, თავიანთ ახლობლებს, რადგან მათ შეუძლიათ, კორონავირუსი გადასცენ თავიანთ თანამოძმეებს ამის გაცნობიერების გარეშე, რაც დიდი საფრთხეა", — აცხადებს ის.