ერთიანი ეროვნული გამოცდებისა და საგრანტო კონკურსის შედეგები ცნობილია. ამის შესახებ ინფორმაციას შეფასებისა და გამოცდების ეროვნული ცენტრი, Naec აქვეყნებს.

აბიტურიენტებს შედეგების გაგება შეუძლიათ ვებგვერდზე: Online.naec.ge, შესაბამის ველში უნდა მიუთითოს პირადი ნომერი და ხუთნიშნა პაროლი. სისტემაში შესვლის შემდეგ აბიტურიენტი ნახავს საკუთარ შედეგს, ინფორმაციას უმაღლეს საგანმანათლებლო დაწესებულებაში ჩარიცხვისა და სახელმწიფო გრანტის მოპოვების თაობაზე.

გარდა ამისა, საბოლოო შედეგების გაგებას აბიტურიენტები მოკლე ტექსტური შეტყობინებითაც შეძლებენ — გამოსაცდელმა მობილური ტელეფონიდან (მაგთი, ჯეოსელი) საკუთარი საგამოცდო საიდენტიფიკაციო ცხრანიშნა ნომერი უნდა გააგზავნოს ნომერზე 93333. SMS-ის ფასი 50 თეთრია.

გამოცდების ეროვნული ცენტრის ინფორმაციით, 2021 წელს ერთიან ეროვნულ გამოცდებში მონაწილეობის სურვილი სულ 38 400-ზე მეტმა აბიტურიენტმა გამოთქვა, რომელთა 76%-ზე მეტი, 29 362 სტუდენტი გახდა. ამასთან, სახელმწიფო გრანტი გადანაწილდა 6 500-ზე მეტ სტუდენტზე, სახელმწიფოს მიერ სრულად დაფინანსებულ საგანმანათლებლო პროგრამებზე კი სწავლას 4 200-ზე მეტი აბიტურიენტი განაგრძობს. Naec-ის ინფორმაციით, ქართულ ენაში მომზადების პროგრამაზე ჩაირიცხა 1330-ზე მეტი გამოსაცდელი.

რაც შეეხება ქულების გასაჩივრებას, გამოცდების ეროვნული ცენტრი მიუთითებს, რომ ამ მექანიზმს აბიტურიენტთა 3%-მა, 3 355-მა ადამიანმა მიმართა, რომელთაგან შეფასება შეიცვალა 1 435 შემთხვევაში/

2021 წლის ერთიანი ეროვნული გამოცდები პირველ ივლისს დაიწყო. მთელი საქართველოს მასშტაბით 25 საგამოცდო ცენტრი იყო გახსნილი. გამოცდების ეროვნული ცენტრი მიუთითებს, რომ პროცესი კორონავირუსის საწინააღმდეგო რეკომენდაციების სრული დაცვით მიმდინარეობდა. მათივე ინფორმაციით, დამატებითი საგამოცდო სესიები 600-ზე მეტი მონაწილისათვის დაინიშნა, რომლებსაც კოვიდინფექცია დაუდასტურდათ და ამის გამო ვერ შეძლეს დანიშნულ დღეს საგამოცდო ცენტრში მისვლა. როგორც Naec-ში აღნიშნავენ, მათგან აბიტურიენტი იყო 200-ზე მეტი.