ქავთარაძის საველე ჰოსპიტალში კორონავირუსით ინფიცირებული პაციენტი გარდაიცვალა. ინფორმაცია On.ge-ს საველე ჰოსპიტალის ხელმძღვანელმა, მერაბ ჩიქოვანმა დაუდასტურა.

"დაფიქსირდა გულის გაჩერება, დაუყოვნებლივ მოხდა დაწყება რეანიმაციული ღონისძიებებისა გათვალისწინებული პროტოკოლით, თუმცა გულის რიტმის ამუშავება ვერ მოხერხდა. პაციენტი არ იყო მძიმე მდგომარეობაში, მისი მდგომარეობა იყო საშუალო სიმძიმის, იმყოფებოდა "ჰაი ფლოუ" სისტემის აპარატზე, მიეწოდებოდა მაღალი ინტენსივობით ჟანგბადი, დაფიქსირდა გულის გაჩერება და რეანიმაცია აღმოჩნდა უშედეგო", — განაცხადა მან.

27 აგვისტოს მონაცემებით, საქართველოში კორონავირუსის 4 247 ახალი შემთხვევა დადასტურდა, გამოჯანმრთელდა 3 053, ხოლო გარდაიცვალა — 74 ადამიანი. ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 540 449-ს, მათგან გამოჯანმრთელდა — 476 555, ხოლო ვირუსს ჯამში ემსხვერპლა 7 175 ადამიანი.

საქართველოში 4 სხვადასხვა ვაქცინა: ფაიზერი, სინოფარმი, სინოვაკი და ასტრაზენეკა არის შემოტანილი. აცრა შეუძლია ყველა მსურველს, 16 წელს ზევით. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.

გაიგეთ მეტი: როგორ უნდა მიხვიდეთ ასაცრელად, როცა საზოგადოებრივი ტრანსპორტი შეზღუდულია — მარშრუტები