ევროკავშირის ელჩი, კარლ ჰარცელი მადლობას უხდის საქართველოს ავღანეთიდან მოქალაქეების ევაკუაციაში დახმარებისთვის.

"მადლობა საქართველოს ქაბულიდან ევაკუაციისადმი მტკიცე მხარდაჭერისთვის, რომელმაც ევროკავშირის წევრ ქვეყნებს საშუალება მისცა სწრაფად და უსაფრთხოდ განეხორციელებინათ ტრანზიტი და გადაეყვანათ ხალხი თბილისის აეროპორტში", — წერს ის ტვიტერზე.

თბილისის აეროპორტის გავლით ადამიანების გადაყვანის შესაძლებლობისთვის საქართველოს მადლობა გადაუხადა ნიდერლანდელის საელჩომაც. მათი თქმით, ქაბულის აეროპორტში არსებული მძიმე სიტუაციის შემდეგ, თბილისის აეროპორტის კომფორტული და მოქნილი თანამშრომლობა მნიშვნელოვანი იყო.

თბილისის აეროპორტში განლაგდა NATO-ს სამხედრო-სატრანსპორტო გადაზიდვების ორგანიზაციის სამხედრო-სატვირთო თვითმფრინავები, რომლებიც ყოველდღიურად ასრულებენ ფრენებს ქაბულის მიმართულებით, ხოლო ქაბულიდან თბილისის აეროპორტში ევაკუირებული მგზავრები სხვადასხვა ჩარტერული რეისებით გადაჰყავთ.

მთავრობის განცხადებით, საქართველოში შემოყვანისა და განთავსებისას გათვალისწინებულია COVID-უსაფრთხოების წესები, ხოლო საქართველოში მათ ყოფნასთან დაკავშირებულ ხარჯებს ანაზღაურებენ შესაბამისი საერთაშორისო ინსტიტუტები.