დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელი, ამირან გამყრელიძე ორსულ ქალებს მოუწოდებს აიცრან ფაიზერის ვაქცინით. ის ამბობს, რომ ქვეყნისა და საზოგადოების მოღალატეა ყველა, ვინც ორსულს ეტყვის, რომ არ აიცრას.

"ის ხომ მოღალატე იქნება ნამდვილად, ქვეყნის და საზოგადოების, ვინც ორსულს ეტყვის, რომ არ აიცრა. ისეთი ტროპიზმი აქვს ამ დელტა შტამს, რომ უკვე წარმოუდგენელია. ამიტომ, ორსულებს განსაკუთრებული ყურადღება [სჭირდებათ].

მოვუწოდებ, ყველა ორსულ ქალბატონს, რომ მიბრძანდნენ და ფაიზერით აიცრან. ვაქცინა საკმარისია. არავითარი გართულება არ იქნება და დაიცავს ორსულებს შემდგომი გართულებებისგან თუ მათ კოვიდი შეხვდათ და იმ ფატალური გამოსავლისგან, რაც დღეს დილასაც გვქონდა — 19 წლის ახალგაზრდა, სიცოცხლით სავსე გოგონა [გარდაიცვალა]", — განაცხადა ამირან გამყრელიძემ.

მისი ინფორმაციით, ახლა მუშავდება ახალი პროტოკოლები, ორსულთა მოვლასთან დაკავშირებით. ის მეან-გინეკოლოგს, რომლებსაც პირდაპირი ურთიერთობა აქვთ ორსულებთან, მოუწოდებს, დაარწმუნონ ორსულები, რომ აიცრან.

გაგუას კლინიკის დირექტორის, გინეკოლოგ დავით გაგუას თქმით, ორსულ ქალს რომ შეუნარჩუნდეს ჯანმრთელობა და სიცოცხლე, აუცილებლად უნდა აიცრას. ჯანდაცვის მინისტრის მოადგილის, თამარ გაბუნიას ინფორმაციით, დელტა შტამი ორსულებში განსაკუთრებით მაღალი რისკის მატარებელია. ქვეყანაში დაფიქსირებული კორონავირუსის შემთხვევების აბსოლუტური უმრავლესობა სწორედ დელტა შტამია.

წაიკითხეთ ასევე:

საქართველოში 4 სხვადასხვა ვაქცინა, ფაიზერი, სინოფარმი, სინოვაკი და ასტრაზენეკა არის შემოტანილი. ვაქცინაცია შეუძლია ყველა მსურველს, 16 წელს ზევით. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.

გაიგეთ მეტი: როგორ უნდა მიხვიდეთ ასაცრელად, როცა საზოგადოებრივი ტრანსპორტი შეზღუდულია — მარშრუტები