25 თებერვალს იტალიის სენატმა ერთი და იმავე სქესის და ასევე, ჰეტეროსექსუალი წყვილების სამოქალაქო პარტნიორობის შესახებ კანონპროექტს მხარი დაუჭირა.

კანონპროექტს 173 მომხრე და 71 წინააღმდეგი ჰყავდა. მის მისაღებად ახლა ქვედა პალატის თანხმობაა საჭირო. ინფორმაციას BBC ავრცელებს.

გასულ წელს, ადამიანის უფლებების ევროპულმა სასამართლომ იტალია გააკრიტიკა, რადგან ქვეყანას ურთიერთობაში მყოფი ერთი და იმავე სქესის ადამიანების უფლებების დამცავი მექანიზმი არ გააჩნდა.

იტალიის პრემიერმინისტრმა სენატის გადაწყვეტილებას ისტორიული მოვლენა უწოდა.

სამოქალაქო პარტნიორობა ორ ადამიანს შორის ერთგული ურთიერთობის სამართლებრივი აღიარებაა, რომელიც ხანდახან ამ ურთიერთობას შეზღუდულ მფარველობას და უფლებებს ანიჭებს.

იტალია ევროპის დასავლეთით ერთადერთი ქვეყანაა, რომელსაც სამოქალაქო პარტნიორობის შესახებ კანონი არ აქვს. ქვეყნის რამდენიმე მუნიციპალიტეტში არსებობს ადგილობრივი რეგულაციები, რომლებიც ლგბტ წყვილების უსაფრთხოებას იცავს.