ჯანდაცვის მინისტრის მოადგილე აცხადებს, რომ ვაქცინაციაში გარდატეხის შესატანად დღეში 40-ათასიანი ნიშნულის მიღწევაა საჭირო. ამის შესახებ თამარ გაბუნიამ საკორდინაციო საბჭოს სხდომის შემდეგ გამართულ ბრიფინგზე ისაუბრა.

მისი თქმით, სექტემბრის ბოლომდე ამ ნიშნულის მიღწევა არის მნიშვნელოვანი, რათა ოქტომბერ-ნოემბერში აღარ იყოს ახალი ტალღა.

"ყოველდღიური აცრების სწორედ 40-ათასიანი ნიშნული არის ჩვენთვის მნიშვნელოვანი იმისთვის, რომ სწრაფად მივიდეთ მოსახლეობის უმრავლესობის ვაქცინაციამდე, რათა შევიტანოთ სერიოზული და რაც მთავარია, სტაბილური გარდატეხა ვაქცინაციაში. ვფიქრობ, სექემბრის ბოლომდე ვაქცინაციის დღეში 40-ათასიანი ნიშნულის მიღწევით მივიღებთ დაცვის ისეთ ფონს, რომ ოქტომბერ-ნოემბერში აღმავალ მიმდინარეობს აღარ ველოდოთ", — ამბობს ის.

მისივე თქმით, დღეის მდგომარეობთ, ჩატარებული აცრების საერთო რაოდენობა უკვე ერთ მილიონს აჭარბებს, 700 ათასამდე აცრილია ერთი დოზით და 300 ათასზე მეტი — ორივე დოზით, რაც ზრდასრული მოსახლეობის 10,7%-ია.

24 აგვისტოს მონაცემებით, საქართველოში კორონავირუსის 5 924 ახალი შემთხვევა დადასტურდა, გამოჯანმრთელდა 4 777, ხოლო გარდაიცვალა — 60 ადამიანი.