ლელომ თბილისის მერობისა და საკრებულოს თავმჯდომარეობის კანდიდატები წარადგინა. პარტიის თავმჯდომარის, მამუკა ხაზარაძის განცხადებით, მერობისთვის ანა ბიბილაშვილი, საკრებულოს თავმჯდომარეობისთვის კი ბადრი ჯაფარიძე იბრძოლებს.

"წარმატებული ქალი, წარმატებული დედა, პროფესიონალი, ურბანისტი, არქიტექტორი, პროფესორი, რომელიც ასევე იღებდა მონაწილეობას სადოქტორო პროგრამებში ლისაბონში — ანა ბიბილაშვილი. ანა, რომელსაც აქვს კონკრეტული ხედვა, რომელიც არის ჩემი თანამებრძოლი, ჩვენი თანამებრძოლი, დამფუძნებელი ლელოსი და არის იმისკენ მოწოდებული, რომ ქალაქის პრობლემები იქნას აბსოლუტურად სხვანაირად გააზრებული", — ასე წარადგინა ხაზარაძემ თბილისის მერობის კანდიდატი.

ლელომ ამ გადაწყვეტილებით კონკურენტი დაუყენა საერთო ოპოზიციურ კანდიდატებს, ნიკა მელიასა და ელენე ხოშტარიას, რომლებსაც მხარს რამდენიმე პარტია უჭერს. თბილისის მერობაზე თავისი კანდიდატი ჰყავს ლეიბორისტულ პარტიასაც. მათი სახელით არჩევნებზე მიხეილ ქუმსიშვილი იბრძოლებს.

თვითმართველობის არჩევნები 2 ოქტომბერს გაიმართება.