ჯანდაცვის მინისტრის, ეკატერინე ტიკარაძის განცხადებით, სწავლის დაწყებისთვის მნიშვნელოვანია, რომ პედაგოგების მაქსიმალური რაოდენობა აიცრას. ამის შესახებ მან კახეთში სამუშაო შეხვედრების შემდეგ ჟურნალისტთან ისაუბრა. მისი თქმით, დაგეგმილია, რომ შეხვდნენ პედაგოგებს და მათ ვაქცინაციის მნიშვნელობაზე ინფორმაცია მიაწოდონ.

"თქვენ იცით, რომ მნიშვნელოვანია სწავლის დაწყებისთვის პედაგოგების მაქსიმალური ვაქცინაცია და დღეს ასევე დაგეგმილია პედაგოგებთან შეხვედრა, იმისთვის, რომ მათი მოტივაცია იყოს გაზრდილი და პასუხი იყოს გაცემული ყველა იმ კითხვაზე, რომელიც არსებობს დღეს პედაგოგებში ვაქცინის საჭიროებასა და უსაფრთხოებასთან და ასევე, რა დაცვის მექანიზმებს უზრუნველყოფს ვაქცინაცია", — განაცხადა მან.

დაავადებათა კონტროლის ეროვნული ცენტრის დირექტორის, ამირან გამყრელიძის თქმით, თუ ასეთი ეპიდვითარება შენარჩუნდება 15 სექტემბერს საკლასო ოთახებში სწავლის დაწყების რეკომენდაციას ვერ გასცემენ. მან ასევე, ისაუბრა იმაზე, რომ სკოლებში, სადაც მასწავლებლების 80% იქნება აცრილი, შესაძლებელია, პირიქით, სწავლის დაწყება წაახალისონ.