პედრო ალმოდოვარი უკვე ათწლეულებია, თავის მაყურებელს მრავალფეროვანი, ემოციური და შთამბეჭდავი კინოსურათებით ანებივრებს და მისგან წელსაც სასიამოვნო სიურპრიზს უნდა ველოდოთ.

ერთგულმა ფანებმა, ალბათ, უკვე იციან, რომ თანამედროვეობის ეს ერთ-ერთი ყველაზე მნიშვნელოვანი კინოხელოვანი ახალ ფილმზე — Madres Paralelas (პარალელური დედები) მუშაობდა, რომელშიც მთავარ როლს კვლავ ალმოდოვარის დიდი ხნის მუზა, პენელოპე კრუზი ასრულებს.

წლის ერთ-ერთი ყველაზე მაღალი მოლოდინების მქონე ფილმის სულ ცოტა ხნის წინ გამოსული ტრეილერი ამ ორი ხელოვანის თანამშრომლობის შედეგად კიდევ ერთ გამორჩეულ სანახაობას გვპირდება:

გავრცელებული ინფორმაციით, ფილმის სიუჟეტი ორი ქალის შესახებ მოგვითხრობს, რომლებიც ერთმანეთს პალატაში გაიცნობენ, სანამ მშობიარობას ელოდებიან. ისინი ერთმანეთისგან ძალიან განსხვავდებიან, თუმცა ერთად გატარებულ რამდენიმე საათში უზომოდ დაახლოვდებიან და მათი ცხოვრებაც ერთმანეთს დაუკავშირდება.

აღსანიშნავია, რომ Madres Paralelas-ს პრემიერა ვენეციის საერთაშორისო ფესტივალზე შედგება: ალმოდოვარის ახალი ნამუშევარი წლევანდელ ღონისძიებას პირველ სექტემბერს გახსნის.

ფილმმა უკვე მოახერხა, რომ გამოსვლამდე საყოველთაო ყურადღება მიექცია: Instagram-მა პედრო ალმოდოვარის ახალი კინოსურათის პოსტერი შიშველი გამოსახულების გამო ჯერ წაშალა, შემდეგ კი ამის გამო ბოდიში მოიხადა.

ფოტო: SONY PICTURES/EL DESEO