ავღანეთის მუდმივი წარმომადგენელმა გაეროში, გულამ ისაკზაი აცხადებს, რომ უშიშროების საბჭომ ყველაფერი უნდა გააკეთოს, რათა დაუყოვნებლივ შეწყდეს ძალადობა და ადამიანის უფლებების დარღვევა ავღანეთში. ეს განცხადება მან დღეს, 16 აგვისტოს, გაეროს უშიშროების საბჭოს სხდომაზე გააკეთა.

"აღარ არის ბრალდებების დრო. ჩვენ შეგვიძლია თავიდან ავიცილოთ სამომავლო ძალადობა, ავღანეთის ჩართვა სამოქალაქო ომში და მისი იზოლირებულ სახელმწიფოდ ქცევა. სწორედ ამიტომ, უშიშროების საბჭომ და გაეროს გენერალურმა მდივანმა უნდა გამოიყენონ მათ ხელთ არსებული ყველა შესაძლებლობა, მოითხოვოს ძალადობის დაუყოვნებლივი შეწყვეტა და ადამიანის უფლებებსა და საერთაშორისო სამართალს პატივისცემა [...]

მე ვსაუბრობ მილიონობით ავღანელ გოგონასა და ქალზე, რომლებიც დაკარგავენ სკოლაში სწავლის, მუშაობისა და პოლიტიკურ, ეკონომიკურ თუ სოციალურ ცხოვრებაში ჩართვის შესაძლებლობას. მე ვსაუბრობ ათასობით ადამიანის უფლებათა დამცველებზე, ჟურნალისტებზე, აკადემიური წრეებისა თუ საჯარო სამსახურის წარმომადგენლებზე, უსაფრთხოების სამსახურის ყოფილ თანამშრომლებზე, რომლებიც ცხოვრობენ დემოკრატიისა და ადამიანის უფლებების დარღვევის რისკის ქვეშ. მე ვსაუბრობ ათასობით იძულებით გადაადგილებულ პირზე, რომლებსაც სჭირდებათ თავშესაფარი, საკვები და დაცვა ქაბულსა და სხვა ადგილებში", — განაცხადა ისაკზაიმ.

ავღანეთის მუდმივი წარმომადგენელი გაეროში აცხადებს, რომ ორგანიზაციამ არ უნდა დაუშვას არცერთი ადმინისტრაციული ორგანოს აღიარება, რომელიც ძალაუფლებას ძალადობით მოიპოვებს ან ისეთი მთავრობის, რომელიც არ წარმოადგენს ქვეყნის მრავალფეროვნებას.

გაიგე მეტი ავღანეთში მიმდინარე მოვლენებზე: