საქართველოს პრეზიდენტი სალომე ზურაბიშვილის განცხადებით, აუცილებელია, Covid-19-თან ბრძოლის გზაზე ეკლესიამ თავისი კუთვნილი და უაღრესად მნიშვნელოვანი როლი ითამაშოს. ზურაბიშვილის თქმით, სამედიცინო სფეროს წარმომადგენლებმა, სახელმწიფო უწყებებმა და მეთაურებმა, საზოგადოებამ და ეკლესიამ კორონავირუსთან ბრძოლა ერთად უნდა მოიგონ.

"ერთობას საქართველოს ეკლესია განასახიერებდა, მტერზე გამარჯვებას წინ უძღოდა და ერს ზურგს უმაგრებდა. დღესაც აუცილებელია, რომ ეკლესიამ ამ გადარჩენის გზაზე ბრძოლაში თავისი კუთვნილი და უაღრესად მნიშვნელოვანი როლი ითამაშოს. ქართული ეკლესია მუდამ პიროვნული თავისუფლების არჩევანისა და პასუხისმგებლობის მხარეს იდგა და დღესაც დგას. თუმცა დღეს კურთხევის გარეშე ძნელი წარმოსადგენია მინიჭებული თავისუფლების რეალური განხორციელება. ასეთია დღეს ეკლესიის გამოწვევა და საპასუხისმგებლო არჩევანი, რამეთუ ეს ბრძოლა ყველამ ერთად უნდა მოვიგოთ", — განაცხადა ზურაბიშვილმა.