საკოორდინაციო საბჭოს გადაწყვეტილებით, 14 აგვისტოდან 4 სექტემბრამდე, 3 კვირის განმავლობაში სხვადასხვა შეზღუდვა იმოქმედებს. კერძოდ:

  • შეიზღუდება მუნიციპალური ტრანსპორტის მოძრაობა, შეზღუდვა არ შეეხება საქალაქთაშორისო ტრანსპორტს;
  • სრულად იზღუდება ფესტივალები, მასობრივი ღონისძიებები, კონცერტები და სპორტული შეჯიბრებები, გარდა იმ სპორტული შეჯიბრებებისა, რომელიც იმართება საერთაშორისო ეგიდით;
  • იზღუდება ბავშვთა გასართობი ცენტრების მუშაობა;
  • კვების ობიექტების მუშაობა, ნაცვლად ღამის 00:00 საათისა, დასაშვები იქნება 23:00 საათამდე;
  • საჯარო უწყებებს ეძლევათ დავალება, მაქსიმალურად გადაიყვანონ თანამშრომლები მუშაობის დისტანციურ რეჟიმზე და ანალოგიური რეკომენდაციით მიმართეს კერძო სექტორს.

საოპერაციო საბჭოს ხელმძღვანელის, გიორგი ღიბრაძის განცხადებით, ვაქცინაციის მაქსიმალურად გაფართოებისა და ხელმისაწვდომობის მიზნით, აცრის პროცესში ჩაერთვებიან სამხედრო ექიმებიც. მათგან დაკომპლექტებული ბრიგადები სხვადასხვა მუნიციპალიტეტში სხვადასხვა ლოკაციაზე განახორციელებენ ვაქცინაციას.

მისივე თქმით, ჯანდაცვის უწყება განაგრძობს მუშაობას დამატებითი საწოლების მობილიზების მიმართულებით, მაქსიმალურად გამკაცრდება კონტროლი მოქმედი რეგულაციების აღსრულებაზე, მათ შორის, ისეთი სოციალური ღონისძიებების გამართვაზე, როგორიც არის ქორწილი, ქელეხი და ასე შემდეგ. ძალაში რჩება 10 000-ლარიანი ჯარიმა დარღვევაზე და განმეორების შემთხვევაში დალუქვა.

გარდა ამისა, ღიბრაძის თქმით, საბჭოს სხდომაზე დაავადებათა ეროვნული ცენტრის ხელმძღვანელმა, გასცა რეკომენდაცია, სექტემბრიდან კვების ობიექტებში, სპა სალონებში, ფიტნესებსა და მსგავსი ტიპის დაწესებულებებში პირთა დაშვება შესაძლებელი გახდეს მხოლოდ ვაქცინაციის ერთი აცრის ან სრული კურსის, ბოლო 72 საათში ჩატარებული PCR ან ბოლო 24 საათში ჩატარებული სწრაფი ანტიგენის ტესტის უარყოფითი ტესტის საფუძველზე. მისივე თქმით, საბჭო აღნიშნულ საკითხზე იმსჯელებს და მიღებული იქნება შესაბამისი გადაწყვეტილება.

გამყრელიძის განმარტებით, ასეთ დაწესებულებაში შესასვლელი ტესტების გაკეთება სახელმწფოს ხარჯზე არ მოხდება. მისი თქმით, სახელმწიფო უფასო ვაქცინას უზრუნველყოფს და თუ ვინმეს გაკეთება არ სურს, ტესტის ფული თავადვე გადაიხადოს.

"დღეს 7%-მდე ვართ დახლოებით მოსახლეობის მოცვით, სანამ არ ავცილდებით 10%-ს მანამდე დავუშვებთ ჯერჯერობით, რომ ერთჯერ აცრილი ადამიანიც დაშვებული იყვეს ასეთ დაწესებულებაში ყოველგვარი სხვა დამატებითი ღონისძიების გარეშე. ან თუ ის აცრილი არ არის, მაშინ მას ბოლო 72 საათში უნდა ჰქონდეს გაკეთებული და უარყოფითი PCR ტესტი ან ბოლო 24 საათში სწრაფი ანტიგენ ტესტი. ეს საკითხი ჩვენ დავაყენეთ დღეს, ალბათ, საბჭო ამაზე იმსჯელებს, ჩვენი წინადადება იყო რომ ხალხი მოემზადოს.

ხაზი მინდა გავუსვა, რომ ეს 24-საათიანი და 72-საათიანი PCR ან ანტიგენი აღარ იქნება სახელმწიფოს ხარჯზე. სახელწმიფო მოსახლეობას აძლევს საშუალებას, რომ ისინი უფასოდ აიცრან, მაგრამ თუ ჩვენ არ ვიცრებით და გვინდა რესტორანში წასვლა, გვინდა ამ დაწესებულებებში სტუმრობა და წასვლა, მაშინ კეთილი ინებეთ უკვე და თქვენი ხარჯით ან თქვენი დამსაქმებლის ხარჯით გადაიხადეთ თანხა შესაბამისი ტესტირებისთვის", — განაცხადა მან.