საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ თელმიკო და თელასი დააჯარიმა. მათი ცნობით, თელმიკო 75 000 ლარით, ხოლო თელასი 50 000 ლარით დაჯარიმდა.

"დაჯარიმების მიზეზია ქ. თბილისში ელექტროენერგიის აბონენტებზე სისტემურად განხორციელებული არაზუსტი დარიცხვები. სემეკმა კომპანიებს განუსაზღვრა ვადები დარღვევების აღმოსაფხვრელად. ამასთანავე, კომისიის გადაწყვეტილებით, კომპანიებს დაევალათ მოქალაქეებზე ზედმეტობით დარიცხული თანხების დაკორექტირება", — აღნიშნულია სემეკის განცხადებაში.

სემეკის ცნობით, მათ საჩივრით მიმართა არაერთმა მოქალაქემ თელმიკოსა და თელასის მიერ მათი უფლებების დარღვევის შესახებ. კერძოდ, სემეკის განცხადებით, საჩივრები უკავშირდებოდა ივნისსა და ივლისში მოხმარებულ ელექტროენერგიაზე ტარიფის საფეხურის არასწორ მისადაგებასა და გაზრდილი გადასახადის დარიცხვას.

სემეკში აცხადებენ, რომ 2019 წლის 27 დეკემბერს მიღებული საქართველოს კანონის ენერგეტიკისა და წყალმომარაგების შესახებ, 2020 წლის 21 აპრილის საქართველოს მთავრობის N246 დადგენილების ელექტროენერგიის ბაზრის მოდელის კონცეფციის დამტკიცების შესახებ და არაერთი ნორმატიული აქტის შესაბამისად, ელექტროენერგიის ბაზარზე მიმდინარე, დაგეგმილ და მოსალოდნელ ცვლილებებთან დაკავშირებით ინფორმირებული იყო ბაზარის ყველა სუბიექტი.

მათი ცნობით, რეფორმის ფარგლებში საქმიანობის გაყოფის მიზნებიდან გამომდინარე, თელასს დაევალა 2021 წლის 30 ივნისის მდგომარეობით ხარჯების დაფიქსირება და მომხმარებლებისთვის შესაბამისი ქვითრების წარდგენა, ხოლო მიმდინარე წლის პირველი ივლისიდან, შპს თბილისის ელექტრომიმწოდებელ კომპანიას საქართველოს მთავრობის 2021 წლის 25 მაისის №236 დადგენილების შესაბამისად დაეკისრა ელექტროენერგეტიკის სექტორში მიწოდების საჯარო მომსახურების სახით განხორციელების ვალდებულება.

"სემეკი მოუწოდებს კომპანიებს, რომ ზედმიწევნით განახორციელონ კანონმდებლობით დაკისრებული ვალდებულებები, რათა ადგილი აღარ ჰქონდეს მსგავსი ტიპის უხეშ დარღვევებს. დარღვევების განმეორების შემთხვევაში, კომისია კვლავ იმსჯელებს კანონით გათვალისწინებულ სანქციებზე", — აცხადებენ სემეკში.

დღეს გამართულ სხდომაზე საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ დააჯარიმა ჯორჯიან უოთერ ენდ ფაუერიც.