ბრიტნი სპირსს ბედნიერებისთვის ახალი მიზეზი აქვს: მას პირველად აქვს საკუთარი iPad, რაც თავად "გარდამტეხ მომენტად" შეაფასა.

მომღერალმა ინსტაგრამის პირად გვერდზე, სადაც ამჟამად 33 მილიონზე მეტი გამომწერი ჰყავს, ვიდეო გამოაქვეყნა შემდეგი აღწერით: "iPad-ით ჩემი ცხოვრება სულ სხვანაირი ჩანს. აქამდე არასდროს მქონია!!!"

39 წლის ბრიტნი სპირსი ვიდეოში აღფრთოვანებული უზიარებს თავის ფანებს, თუ როგორი ბედნიერია ამ ფაქტით:

"აქამდე მხოლოდ პატარა ტელეფონი მქონდა, მაგრამ ახლა iPad რომ მიჭირავს ხელში, თითქოს ჩემი ცხოვრებაც შეიცვალა და უზომოდ გახარებული ვარ. ეს უბრალოდ ცვლილებების დასაწყისია!"

გრემის მფლობელმა პოპვარსკვლავმა ისიც აღნიშნა, რომ აქამდე მის შვილებს, 16 წლის შონსა და 13 წლის ჯეიდენს, კი ჰქონდათ პლანშეტური კომპიუტერები, მაგრამ მას "საკუთარი არასდროს ჰქონია".

ამ ფაქტმა ფანებს კიდევ ერთხელ შეახსენა ბრიტნის მეურვეობის შედეგები: უკვე 13 წელზე მეტია, მომღერლის სამედიცინო საქმეებს, კარიერას, პირად ცხოვრებას და ფინანსებს მისი მამა, ჯეიმს სპირსი განკარგავს.

"კოშკში გამოკეტილი თანამედროვე პრინცესა გათავისუფლდა და სულ უმცირესი რაღაცებიც კი აბედნიერებს" — წერს ერთ-ერთი ფანი ვიდეოს კომენტარებში.

შეგახსენებთ, რომ ბრიტნი სპირსი თავისი ძალადობრივი მეურვეობის დასრულებას ითხოვს: წლების წინ ფანების მიერ დაწყებულ სოციალურ მოძრაობას #FreeBritney (თავისუფლება ბრიტნის), რომლის ორგანიზატორებიც მიიჩნევენ, რომ სასამართლოს მიერ ბრიტნისთვის დანიშნული კანონიერი მეურვე, მამამისი, არაკეთილსინდისიერად იყენებდა ძალაუფლებას, ცოტა ხნის წინ თავად მომღერალიც შეუერთდა და სასამართლოზე თავისი მძიმე გამოცდილების შესახებ ღიად ისაუბრა.

ამჟამად ამ საკითხზე როგორც სასამართლო, ისე საზოგადოებრივი მწვავე განხილვები გრძელდება და ბრიტნი კვლავ იბრძვის დამოუკიდებლობის მისაღწევად.

ასევე იხილეთ: