რუსეთის ქალაქ ომსკში მცხოვრები ქალი მაკდონალდს უჩივის ჩიზბურგერის რეკლამის გამო, რომელმაც, მისი თქმით, მარხვა დაარღვევინა.

კსენია ოვჩინიკოვა მართლმადიდებელი ქრისტიანია, რომელიც აღდგომის დღესასწაულთან დაკავშირებულ რელიგიურ მარხვას იცავდა, რა დროსაც მორწმუნეს ტრადიციულად ხორცსა და სხვა ცხოველურ პროდუქტებზე გარკვეული პერიოდის განმავლობაში უარის თქმა უწევს.

ადგილობრივი მედიის ცნობით, ოვჩინიკოვა აცხადებს, რომ სწორედ ამ პირობის შესრულებაში ხელი მაკდონალდსმა შეუშალა:

"როცა რეკლამა დავინახე, თავი ხელში ვეღარ ავიყვანე: წავედი მაკდონალდსში და ჩიზბურგერი ვიყიდე", — განაცხადა მან.

ამ ფაქტს ამერიკული მედიაც გამოეხმაურა: გავრცელებული ცნობით, კსენია ოვჩინიკოვა ამ სწრაფი კვების რესტორნების ქსელს "რელიგიური გრძნობების შეურაცხყოფისთვის" უჩივის და მორალური ზიანის ასანაზღაურებლად 1 000 რუბლს (14 დოლარი) ითხოვს.