ჯანდაცვის მინისტრის, ეკა ტიკარაძის განცხადებით, არ შეიძლება მასობრივი შეკრებების ორგანიზება ერთ უწყებას, კულტურის სამინისტროს დაბრალდეს. მისი თქმით, აქვს ინფორმაცია, რომ ასეთი ღონისძიებები აღარ ჩატარდება.

"ჩემთვის რამდენადაც ცნობილია ყველა მსგავსი ღონისძიება გადადებულია და ჩვენ სწორედ ეხლა გვაქვს ინფორმაცია ამის თაობაზე, რომ ეს ღონისძიება არ ტარდება, ტარდება მხოლოდ ჯილდოების გადაცემა, რომელიც იქნება სრულად დაცული იმ რეგულაციების ფარგლებში, რომელიც არის ჩემი მხრიდან მოწოდებული", — განაცხადა მან.

ჟურნალისტმა აღნიშნა, რომ გუშინაც ჩატარდა მსგავსი ღონისძიება და მინისტრს ჰკითხა, გუშინდელის შემდეგ მიმართეს უწყებას, თუ რას უკავშირდება გადადება. პასუხად ტიკარაძემ განაცხადა:

"ამასთან დაკავშირებით ჩვენ გვქონდა, რა თქმა უნდა, კომუნიკაცია და არ შეიძლება, ყველაფერი დაბრალდეს ერთ უწყებას. ეს ღონისძიებები არ ყოფილა კულტურის სამინისტროს მხრიდან ორგანიზებული.

შრომითი ინსპექცია მუშაობს, როგორც კონცერტებთან მიმართებაში, ასევე სხვადასხვა სოციალურ ღონისძიებასთან მიმართებაში და ჩვენ მაქსიმალურად ვცდილობთ, რომ მოხდეს გაკონტროლება და არ განხორციელდეს ისეთი მასიური თავშეყრები, რომლებიც შეიძლება ინფექციის გავრცელების მაღალწყაროდ იქცეს".

Covid-19-ით გარდაცვლილი მომღერლის, თემურ წიკლაურის ხსოვნის პატივსაცემად, კულტურის სამინისტრომ თელავის თეატრში ხალხმრავალი ღონისძიება დაგეგმა. თელავის თეატრში On.ge-ს განუცხადეს, რომ მერიამ მათგან მხოლოდ დარბაზი დაჯავშნა და 350 სტუმარს ელოდებოდნენ.

საქართველოში ბოლო დღეების განმავლობაში მძიმე ეპიდემიოლოგიური ვითარებაა. თეა წულუკიანი არ არის პირველი მთავრობის წარმომადგენლებიდან, რომელიც კორონავიურისის გავრცელების პრევენციისთვის დაწესებულ რეგულაციებს არ იცავს. რთული ეპიდემიოლოგიური ვითარების ფონზე, 7 აგვისტოს ქვეყნის პრემიერმინისტრმა, ირაკლი ღარიბაშვილმა ხალხმრავალ სუფრაზე იქეიფა.