კინოს თუ სერიალების ისტორიაში ერთ-ერთი ყველაზე ცნობილი ოჯახის — ადამსების წევრების შესახებ ნეტფლიქსი ახალ სერიალს იღებს და მასში ერთ-ერთ ყველაზე სახასიათო როლს არც მეტი, არც ნაკლები, კეტრინ ზეტა-ჯონსი მოირგებს.

ეს 51 წლის მსახიობი მორტიშა ადამსს განასახიერებს სერიალში, რომელიც ძირითადად ამ პერსონაჟის შვილის, უენზდის ირგვლივ განვითარდება და შოუსაც სწორედ მისი სახელის შესაბამისი სახელწოდება ექნება — Wednesday.

მორტიშას როლი აქამდე 1960-იანების სერიალში კეროლინ ჯონსს და 1990-იანების ფილმებში ანჯელიკა ჰიუსტონს აქვთ შესრულებული. ამ უკანასკნელის მიერ განსახიერებული მორტიშა ყველაზე ცნობილია, ამიტომ განსაკუთრებით საინტერესოა, შეძლებს თუ არა ჩიკაგოსა და ზოროს ნიღბის ვარსკვლავი, კეტრინ ზეტა-ჯონსი ასეთივე დასამახსოვრებელი გმირის შექმნას.

ფოტო: Giphy

აღსანიშნავია, რომ სერიალს ნეტფლიქსისთვის ისეთი ცნობილი რეჟისორი იღებს, როგორიც ტიმ ბარტონია. ჯერჯერობით პრემიერის თარიღი უცნობია, მაგრამ თამამად შეგვიძლია ვივარაუდოთ, რომ წინ საინტერესო სანახაობა გველოდება.