საგარეო საქმეთა მინისტრი აცხადებს, რომ საქართველოს მიზანია, ევროკავშირის წევრობის სტატუსი 2030 წლამდე მოიპოვოს. ამის შესახებ დავით ზალკალიანმა საგარეო საქმეთა სამინისტროს 10-წლიანი გეგმის პრეზენტაციისას განაცხადა.

როგორც მან აღნიშნა, განაცხადის შეტანის შემდეგ ევროკავშირთან მოლაპარაკებები წევრობისთვის კანონმდებლობის ჰარმონიზაციის საკითხზე დაიწყება.

"ყველასთვის კარგად არის ცნობილი ის ამბიციური მიზანი, რომელიც მთავრობამ გააჟღერა — 2024 წელს ევროკავშირში წევრობაზე განაცხადის შეტანა. მაგრამ ამით არ სრულდება ჩვენი მთავარი მიზანი, ამის შემდეგ 2030 წლამდე ჩვენ უნდა მოვიპოვოთ წევრობის კანდიდატის სტატუსი და ევროკავშირთან გაწევრიანებაზე მოლაპარაკებები გავხსნათ, ევროკავშირის კანონმდებლობის საქართველოს კანონმდებლობაში გადმოტანის მიმართულებით", — აცხადებს ზალკალიანი.

საქართველოს ხელისუფლებამ 2020 წლის პარლამენტის არჩევნების წინ განაცხადა, რომ ევროკავშირის წევრობაზე განაცხადის შეტანას 2024 წლისთვის გეგმავს. თუმცა, მას შემდეგ საერთაშორისო პარტნიორების მხრიდან არაერთი სკეპტიკური განცხადება გაკეთდა, რომ ევროკავშირში გაწევრიანების პრეტენზიისთვის არსებითი რეფორმების გატარებაა საჭირო.