ქართული ოცნების თბილისის მერობის კანდიდატი, კახა კალაძე თბილსერვისის დასუფთავების სამსახურის თანამშრომლების გაფიცვას "დაგეგმილ პროვოკაციას" უწოდებს. 6 აგვისტოს მთელი დღის განმავლობაში გაფიცვის შემდეგ, რასაც თბილისის ქუჩებში ნაგვის ურნების გადავსება მოჰყვა, კალაძე 7 აგვისტოს ღამით ფეისბუქლაივში ჩაერთო, სადაც ჩანს დასუფთავების რამდენიმე თანამშრომლებთან ერთად როგორ გააქვთ ნაგავი გარკვეული ტერიტორიიდან. სწორედ ამ ჩართვისას თქვა მან, რომ თბილსერვისის თანამშრომლებს "პროვოკატორები აბუნტებენ".

უეცრად, რამდენიმე ადამიანის ხელმძღვანელობით, მოხდა გაფიცვა, უფრო სწორად გაფიცვის მცდელობა იყო. იმიტომ, რომ ადამიანების ნაწილი, ვინც დაბრუნდა სამუშაოზე, მიდიოდა ბულინგი, დაშინება, რაც არის სისხლის სამართლის დანაშაული. რა თქმა უნდა, ჩვენ არავის არ მივცემთ იმის შესაძლებლობას, რომ რამდენიმე კრიმინალმა შეურაცხყოფა მიაყენოს თანამშრომლებს, დაემუქროს და ფიზიკურად გაუსწორდეს. ეს არის დასჯადი და რა თქმა უნდა, ამას ყოველთვის მოჰყვება შესაბამისი რეაგირება", — განაცხადა კახა კალაძემ.

დასუფთავების სამსახურის თანამშრომლებმა 6 აგვისტოს რთულ სამუშაო პირობები გააპროტესტეს და ხელფასის მომატების მოთხოვნით აქცია გამართეს. მათი განცხადებით, ამ დრომდე არ აქვთ ზაფხულის უნიფორმა და დაზიანებული ურნების თრევა უწევთ. დედაქალაქის ვიცე-მერმა, ირაკლი ხმალაძემ გაფიცვას "უკანონო" უწოდა და განაცხადა, რომ დასუფთავების სამსახურის თანამშრომლებისთვის ხელფასების მომატება და უნიფორმის შეცვლა ისედაც დაგეგმილი იყო.

თბილსერვის ჯგუფის ხელმძღვანელობა, მერიის წარმომადგენლებთან ერთად გაფიცულებს შეხვდა, რის შემდეგაც მერიაში განაცხადეს, რომ მათი ნაწილი სამუშაოს დაუბრუნდა.

დასუფთავების სამსახურის გაფიცულ თანამშრომლებს სოლიდარობა გამოუცხადა სოციალური სამართლიანობის ცენტრმა. ორგანიზაციამ შრომის ინსპექციას თბილსერვისის შემოწმებისკენ მოუწოდა.