წულუკიანის მიერ მთავარი არხის ჟურნალისტისთვის მიკროფონის წართმევის და დღემდე არდაბრუნების შემდეგ, ამავე არხის ჟურნალისტს მიკროფონი, სამსახურეობრივი მოვალეობის შესრულების დროს, გორში მოჰპარეს. გიორგი ახალკაცისთვის მიკროფონის მოპარვის შესახებ ინფორმაციას ტელეკომპანია ავრცელებს.

ჟურნალისტი გიორგი ახალკაცი ამბობს, რომ შემთხვევა ნაციონალური მოძრაობის ოფისთან მოხდა და იმედოვნებს, რომ სამართალდამცველები დაადგენენ, რა ვითარებაში გაუჩინარდა მთავარი არხის კუთვნილი აპარატურა.

"როგორც ჩემთვის არის ცნობილი, მიმდინარეობს სამეთვალყურეო კამერების შემოწმება", — განაცხადა ახალკაცმა.

On.ge-ს შსს-ში განუცხადეს, რომ გამოძიება სისხლის სამართლის კოდექსის 177-ე მუხლით მიმდინარეობს, რაც ქურდობას გულისხმობს.

22 ივლისს კულტურის მინისტრმა, თეა წულუკიანმა, მთავარი არხის ჟურნალისტს სამსახურეობრივი მოვალეობის შესრულებისას მიკროფონი წაართვა, რომელიც ამ დრომდე არ დაუბრუნებია. მეორე დღეს მთავარმა არხმა მიკროფონის წართმევის ფაქტზე პროკურატურას მიმართა, თუმცა, გამოძიება არ დაწყებულა.