ლიტერატურული პრემია ლიტერა 2021-ს გაუქმების შემდეგ, აღარც ლიტერა მთარგმნელებისთვის ჩატარდება. კონკურსი მწერალთა სახლის ინიციატივით 2020 წელს დაარსდა და მას კულტურის სამინისტრო აფინანსებდა.

მწერალთა სახლი აცხადებს, რომ წლევანდელი "ლიტერას" კონკურსის გაუქმების მიზეზიც მწერლების, ლიტერატორებისა და გამომცემლების პროტესტი გახდა, რაც სამინისტროს მხრიდან ჟიურიში წარმომადგენლის, იოსებ ჭუმბურიძის დანიშვნას მოჰყვა:

"მწერალთა სახლი იმედოვნებს, რომ მომავალ წელს შეძლებს ორივე პროექტის წარმატებულად განხორციელებას".

ლიტერატურული პრემია "ლიტერა" და მთარგმნელობითი პრემია "ლიტერა მთარგმნელებისთვის" კულტურის, სპორტისა და ახალგაზრდობის სამინისტროს მიერ ფინანსდება სამინისტროს მიერ დამტკიცებული პროგრამის "კულტურის ხელშეწყობა" ფარგლებში ერთიან პროექტად.

"სამინისტროს პოზიციაა, განიხილოს ორივე პრემიის ჩატარება ერთიან ჭრილში, შესაბამისად, ლიტერატურული კონკურსი "ლიტერა მთარგმნელებისთვის 2021" ვეღარ გაიმართება", — აცხადებს მწერალთა სახლი.