ნაციონალური მოძრაობის ერთ-ერთი ლიდერი, ზაალ უდუმაშვილი ამბობს, რომ სჯობდა პრეზიდენტ სალომე ზურაბიშვილს განცხადება მაშინ გაეკეთებინა, როცა მიშელის შეთანხმება ირღვეოდა და არა მაშინ, როცა ქართულმა ოცნებამ იგი ანულირებულად გამოაცხადა. ზაალ უდუმაშვილი გამოეხმაურა პრეზიდენტის მიერ ენმ-ს კრიტიკასაც დოკუმენტზე ხელმოწერის გამო და განაცხადა, რომ მან კარგად იცის, რატომ არ მოაწერა ხელი პარტიამ შეთანხმებას.

"სალომე ზურაბიშვილმა ძალიან კარგად იცის, რატომაც არ მოვაწერეთ ამ განცხადებას ხელი. ამ განცხადებას სჯობდა, თავის დროზე გაეკეთებინა განცხადება, როდესაც ქართული ოცნება უკვე შეთანხმებულ დოკუმენტს არღვევდა იმ კანონპროექტებით, რომელსაც იღებდა. მე ვგულისხმობ, ამნისტიის შესახებ კანონს, მართლმსაჯულების რეფორმას — არცერთი განცხადება ჩვენ სალომე ზურაბიშვილისგან ამ პერიოდში არ მოგვისმენია, პრაქტიკულად, როდესაც ირღვეოდა ეს დოკუმენტი.

საბოლოო ჯამში, მან გააკეთა ეს განცხადება მხოლოდ და მხოლოდ იმის გამო, რომ ძალიან დიდია დღეს წნეხი ჩვენი საერთაშორისო პარტნიორების", — განაცხადა ზაალ უდუმაშვილმა.

მას შემდეგ, რაც სალომე ზურაბიშვილი მიშელის შეთანხმების ხელმომწერი პოლიტიკოსების ნაწილს შეხვდა, გუშინ, 3 აგვისტოს სპეციალური ბრიფინგი გამართა და განაცხადა, რომ ვერ აიღებს პასუხისმგებლობას ვერც დოკუმენტის ცალკეულ ელემენტებზე და ვერც მის ანულირებაზე. ზურაბიშვილმა, ასევე, აღნიშნა, რომ არ ეთანხმება ქართული ოცნების არგუმენტებს, რითაც ხსნიან დოკუმენტის ანულირება. პრეზიდენტმა განაცხადა, რომ როცა უცხოეთისგან პატივისცემას ვითხოვთ, თავადაც უნდა ვიმსახურებდეთ პატივისცემას, ამისთვის კი ნაკისრ ვალდებულებებს უნდა ვასრულებდეთ.

გაიგე მეტი: