პარლამენტის პირველი ვიცე-სპიკერი, გია ვოლსკიი ფიქრობს, რომ პრეზიდენტის კრიტიკულ განცხადებას დაბალანსება სჭირდებოდა. ვოლსკის აზრით, სალომე ზურაბიშვილმა არაობიექტურად შეაფასა დესტრუქციული პროცესების განვითარების მცდელობა კონკრეტული პოლიტიკური პარტიების წარმომადგენლების მხრიდან.

"განცხადებას მნიშვნელოვნად აკლდა დაბალანსება, ვინაიდან გასვლა ამ შეთანხმებიდან ერთია, რასაც საკმაოდ სერიოზული საფუძველი და წინაპირობა აქვს და მეორეა, როცა ამ შეთანხმებას საერთოდ არ უერთდები, რაზეც მე ვფიქრობ, პრეზიდენტს მეტი აქცენტი უნდა გაეკეთებინა", — განაცხადა ვოლსკიმ.

ვოლსკიმ ასევე აღნიშნა, რომ ნაციონალურ მოძრაობას დესტაბილიზაციის პროცესზე არასდროს უთქვამს უარი და ამის არ დანახვა სწორი არ არის.

"მმართველ პარტიას აქვს გარკვეული ვალდებულებები, მაგრამ რეალურია ისიც, რომ დესტაბილიზაციის სტრატეგიაზე არასდროს უთქვამს ნაციონალურ მოძრაობას უარი და ამის არ დანახვა არ არის სწორი. ვფიქრობ, პრეზიდენტი ეცადა, ასე თუ ისე, გამოეყვანა სიტუაცია უფრო მეტად დაბალანსებული და პრაქტიკულად არაობიექტური შეფასება მისცა იმ ნაწილს, რასაც ჰქვია დესტრუქციული პროცესების განვითარების ინტენსიური მცდელობა კონკრეტული პოლიტიკური პარტიების სუბიექტების მხრიდან", — აღნიშნა ქართული ოცნების დეპუტატმა.

მას შემდეგ, რაც სალომე ზურაბიშვილი მიშელის შეთანხმების ხელმომწერი პოლიტიკოსების ნაწილს შეხვდა, გუშინ, 3 აგვისტოს სპეციალური ბრიფინგი გამართა და განაცხადა, რომ ვერ აიღებს პასუხისმგებლობას ვერც დოკუმენტის ცალკეულ ელემენტებზე და ვერც მის ანულირებაზე. ზურაბიშვილმა აღნიშნა, რომ არ ეთანხმება ქართული ოცნების არგუმენტებს, რითიც ხსნიან დოკუმენტის ანულირება.

გარდა ამისა, ზურაბიშვილმა სიტყვით გამოსვლისას კიდევ ერთხელ გაუსვა ხაზი შეთანხმების შესრულების აუცილებლობას და მმართველი გუნდის წევრები გააკრიტიკა. მან განაცხადა, რომ ჩვენ მოვითხოვთ უცხოეთისგან პატივისცემას და გვაღიზიანებს მათი მითითებები და კრიტიკა, თუმცა იმისთვის რომ პატივისცემა დავიმსახჯუროთ, სიტყვას პატივი უნდა ვცეთ და ნაკისრი ვალდებულებები შევასრულოთ.