პრემიერმინისტრი, ირაკლი ღარიბაშვილი საერთაშორისო რესპუბლიკური ინსტიტუტისა (IRI) და ეროვნულ-დემოკრატიული ინსტიტუტის (NDI) კვლევების დისკრედიტაციას მათი ნაციონალურ მოძრაობასთან დაკავშირებით ცდილობს. IRI-ს მიერ 2 აგვისტოს გამოქვეყნებული კვლევის შედეგებზე კითხვის საპასუხოდ, ღარიბაშვილმა განაცხადა, რომ ისინი "ძალიან დიდი კითხვის ნიშნებს იწვევს".

"თქვენ იცით ჩვენი პოზიცია. ჩვენ არასოდეს ვენდობოდით ნაციონალური მოძრაობის კვლევითი ორგანიზაციების მიერ ჩატარებულ კვლევებს ადგილზე. აქვე მინდა დავადასტურო, ჩვენ, რა თქმა უნდა, პატივს ვცემთ IRI-ს და NDI-ს, მაგრამ, მათ მიერ დაქირავებული ... ადგილზე ჩატარებული კვლევები, ძალიან დიდ კითხვის ნიშნებს იწვევს, ვინაიდან, ორგანიზაციები, რომლებიც ატარებენ კვლევებს ადგილზე, საველე სამუშაოებს, არიან უშუალოდ მართული და კონტროლირებული ნაციონალური მოძრაობის მიერ. შესაბამისად, არავითარ ნდობას არ იმსახურებს არც IRI-ს და არც NDI-ს მიერ დაკვეთილი კვლევები", — განაცხადა ირაკლი ღარიბაშვილმა.

IRI-ს მიერ 2 აგვისტოს გამოქვეყნებული კვლევის მიხედვით, მოქმედი პრემიერი, ირაკლი ღარიბაშვილი გამოკითხულთა მხოლოდ 40%-ს მოსწონს. ამ მაჩვენებლით იგი მეოთხე ადგილზეა და ჩამორჩება ყოფილ პრემიერმინისტრს, გიორგი გახარიას, თბილისის მეორობის კანდიდატს ქართული ოცნებიდან, კახა კალაძეს და საქართველოს კათოლიკოს-პატრიარქს, ილია II-ს. ამავე კვლევის მიხედვით, გამოკითხულთა 38% ფიქრობს, რომ მომავალი არჩევნები არ იქნება თავისუფალი და სამართლიანი, 51% კი ვადამდელი საპარლამენტო არჩევნების ჩატარების მომხრეა.

აღნიშნული კვლევა ჩატარდა IRI-ს კვლევების ცენტრის სახელით, ბალტიის კვლევებისა და გელაპის ორგანიზაციის წარმომადგენლის დოქტორი რასა ალიშაუსკინეს მიერ. საველე სამუშაოები ჩატარდა IPM-მა.