წელს 25 ივლისიდან 2 აგვისტოს ჩათვლით იაპონიაში დისტანციურად გაიმართა ქიმიის 53-ე საერთაშორისო სასწავლო ოლიმპიადა, სადაც სამმა ქართველმა მოსწავლემ სამი ბრინჯაოს მედალი მოიპოვა.

როგორც შოთა რუსთაველის საქართველოს ეროვნული სამეცნიერო ფონდი იტყობინება, ბრინჯაოს მედლის მფლობელები გახდნენ: ქეთი პერანიძე (აკადემიკოს ილია ვეკუას სახელობის ფიზიკა-მათემატიკის ქალაქ თბილისის №42 საჯარო სკოლა), ნინი აბესაძე (თბილისის პირველი ექსპერიმენტული საჯარო სკოლა) და იოანე კაპანაძე (გივი ზალდასტანიშვილის სახელობის ამერიკული აკადემია თბილისში).

ქიმიის მეცნიერებათა დოქტორის ელიზბარ ელიზბარაშვილის ცნობით, ქართველი მოსწავლეების გუნდის მეოთხე წევრს, მეათეკლასელ ლიზი დარჩიასაც წინა მსგავს ტურნირებთან შედარებით წელს უკვე გაუმჯობესებული შედეგები ჰქონდა, რის გამოც მას მომავალში მეტ წარმატებას უწინასწარმეტყველებენ.

აღსანიშნავია, რომ მანამდე სხვა საგნებშიც გაიმართა საერთაშორისო სასწავლო ოლიმპიადები, სადაც საქართველოს ნაკრებმა ასევე მიაღწია წარმატებას:

  • ინფორმატიკის 33-ე საერთაშორისო სასწავლო ოლიმპიადაზე ვლადიმირ კომაროვის თბილისის ფიზიკა-მათემატიკის №199 საჯარო სკოლის მოსწავლე გიორგი ნადარეიშვილი ბრინჯაოს სიგელით დაჯილდოვდა;
  • ბიოლოგიის 32-ე საერთაშორისო სასწავლო ოლიმპიადაზე ვლადიმირ კომაროვის თბილისის ფიზიკა-მათემატიკის №199 საჯარო სკოლის მოსწავლე გიორგი პაპულაშვილს საპატიო სიგელი გადაეცა;
  • მათემატიკის 62-ე საერთაშორისო სასწავლო ოლიმპიადაზე საქართველოს გუნდი 1 ვერცხლის, 3 ბრინჯაოს და 1 საპატიო სიგელით დაჯილდოვდა. ვერცხლის მედალი ვლადიმირ კომაროვის თბილისის ფიზიკა-მათემატიკის №199 საჯარო სკოლის მოსწავლეს მიხეილ კვინიკაძეს გადაეცა, ბრინჯაოს მედლის მფლობელები კი გახდნენ ანა ონოფრიშვილი და ზაურ ბოკელავაძე ვლადიმირ კომაროვის თბილისის ფიზიკა-მათემატიკის №199 საჯარო სკოლიდან და დემეტრე გელაშვილი (აკადემიკოს ილია ვეკუას სახელობის ფიზიკა-მათემატიკის ქალაქ თბილისის №42 საჯარო სკოლა).

  • ფიზიკის 51-ე საერთაშორისო სასწავლო ოლიმპიადაზე საქართველოს გუნდი 4 ბრინჯაოს მედლით და 1 საპატიო სიგელით დაჯილდოვდა: ბრინჯაოს მედლის მფლობელები გახდნენ ირაკლი უგულავა, ანდრია მანჯავიძე, ნიკოლაი მალცევი და დაჩი ჭოტაშვილი ვლადიმირ კომაროვის თბილისის ფიზიკა-მათემატიკის №199 საჯარო სკოლიდან.