კულტურის სამინისტროს მიერ დანიშნულმა ლიტერას ჟიურის წევრმა, იოსებ ჭუმბურიძემ On.ge-სთან საუბრისას განაცხადა, რომ ჟიურის არ დატოვებს. მას შემდეგ, რაც ჟიური მწერალთა სახლის მიერ დანიშნულმა წევრებმა დატოვეს, ის ერთადერთია, რომელიც ლიტერას ჟიურიში რჩება.

"როგორ გგონიათ, არ ვიცი?" — ამ სიტყვებით ადასტურებს იოსებ ჭუმბურიძე, რომ იცის, ამ დროისთვის ჟიურიში მისი სახით მხოლოდ ერთი წევრი რომაა დარჩენილი.

"არ ვხსნი [კანდიდატურას]. ვწუხვარ [პროტესტზე]. ჩემთვის აუხსნელია, გაუგებარია, ძალიან ვწუხვარ", — ამბობს და სამინისტროს მხრიდან ლიტერატურულ პროცესებში ჩარევის მცდელობას გამორიცხავს: "ჟიურის ერთი წევრით? სად უნახავთ ჩემი არასწორი ჩარევა?! უტაქტო ჩარევა?! არაობიექტური ჩარევა?! მე არაერთი ლიტერატურული კონკურსის ჟიურის წევრი ვყოფილვარ და ვერავინ იტყვის, რომ ოდესმე მიკერძოება გამომიჩენია ან პირიქით — არაობიექტურობა".

ხოლო კითხვაზე, არის თუ არა თეა წულუკიანის მრჩეველი, ჭუმბურიძე გვპასუხობს:

"ვთქვათ ვარ მრჩეველი, ეს არანაირ წინააღმდეგობაში არ მოდის იმასთან, რომ ვიყო ჟიურის წევრი".

ლიტერატურულ პრემია ლიტერაში მონაწილეობაზე უარი უკვე ჯამში გრძელ სიაში შესულმა 17-მა კონკურსანტმა თქვა. თავდაპირველად ხელოვანები თეა წულუკიანის ქმედებებს და შესაბამისად, კულტურის სამინისტროს და მის კონკურსს უცხადებდნენ ბოიკოტს, ხოლო მას შემდეგ, რაც ლიტერას ჟიურიში კულტურის სამინისტრომ წევრი დანიშნა, კონკურსი 10-ზე მეტმა ხელოვანმა დატოვა.

დღეს ლიტერას ჟიური ასევე დატოვა მწერალთა სახლის მიერ შერჩეულმა ოთხივე წევრმა და ჟიურიში მხოლოდ სამინისტროს დანიშნული წევრი, იოსებ ჭუმბურიძე დარჩა. კულტურის სამინისტრო კითხვას, აპირებს თუ არა დანიშნული ჟიურის წევრის გაწვევას, არ პასუხობს.

ჭუმბურიძის უკან გაწვევა კულტურის სამინისტროს გუშინვე მოსთხოვა მწერალთა სახლის სამეთვალყურეო საბჭომ და ლიტერაში მონაწილე ავტორების, დიზაინერების, მთარგმნელებისა და გამომცემლების ნაწილმა. ამჟამად ღია წერილს 100-მდე ხელმოწერა აქვს.

ლიტერას პრემია 2015 წლიდან არსებობს და აქამდე პრემიის ჟიური დამოუკიდებლად ირჩეოდა. სახელმწიფო პრემიის ჟიურიში წელს პირველად დანიშნა კულტურის სამინისტრომ თავისი წარმომადგენელი. ამისთვის დებულებაში ცვლილებები ცოტა ხნის წინ შევიდა.

ასევე იხილეთ: