საქართველოს ახალგაზრდა იურისტთა ასოციაციის წარმომადგენელი, ვახუშტი მენამდე აცხადებს, რომ შარლ მიშელის შეთანხმებაზე ქართული ოცნების მხრიდან უარის თქმა წარმოუდგენლად უპასუხისმგებლოა. როგორც ის On.ge-სთან ამბობს, მმართველის პარტიის მიერ დასახელებული 53% არ არის პირობა. მენაბდის აზრით, დღევანდელი განცხადებით ხელუსუფლებამ ოპოზიციას უთხრა, რომ შეთანხმებიდან გადის და რიგგარეშე არჩევნები იქნება იმ შემთხვევაში, თუ ოპოზიცია ხელშეკრულების დარღვევის მიუხედავად გააგრძელებს პარლამენტში ყოფნას და თანამშრომლობას, რაც უსამართლოა.

"53% არ არის პირობა, სასხვათაშორისოდ ნათქვამი პროცენტი იყო. სინამდვილეში, აქ საუბარია იმაზე, რომ რიგგარეშე არჩევნებს იმ შემთხვევაში დანიშნავენ, თუ ოპოზიცია მოიქცევა "პასუხისმგებლიანად". რას ნიშნავს ეს? ნიშნავს იმას, რომ მმართველი პარტია გადის შეთანხმებიდან და ამის მიუხედავად, ოპოზიცია მაინც უნდა დარჩეს პარლამენტში, ითანამშრომლოს ხელისუფლებასთან და ა.შ. ასე უნდა წავიკითხოთ ოცნების განცხადება — რომ მიუხედავად იმისა, რომ ჩვენ გავედით შეთანხმებიდან, თუ ოპოზიცია მაინც დარჩებით პარლამენტში, გააგრძელებთ პოლიტიკურ ცხოვრებას ისე, თითქოს არაფერი მომხდარა, ჩვენ ვიფიქრებთ იმაზე, დავნიშნოთ თუ არა რიგგარეშე არჩევნები არჩევნების შედეგების მიუხედავად. ანუ თუ ჩვენს ამ დესტრუქციულ ქმედებას თქვენ მშვიდად შეხვდებით და არ უპასუხებთ რადიკალური ნაბიჯებით, კი ბატონო. მე მგონია, რომ ეს სამართლიანი არ არის. ცხადია, მე არ ვამბობ იმას, რომ ოპოზიცია უნდა გამოვიდეს, მე ვამბობ, რას გულისხმობს ოცნება, როცა ამას ამბობს", — აცხადებს საიას დემოკრატიული ინსტიტუტების მხარდაჭერის პროგრამის დირექტორი.

ამასთან, ვახუშტი მენაბდე მიიჩნევს, რომ ქართული ოცნების ეს ნაბიჯი კრიზისს კიდევ უფრო გააღრმავებს.

"მმართველი პარტიის ეს ნაბიჯი წარმოუდგენლად უპასუხისმგებლოა და მასხრად იგდებს იმ დემოკრატიულ პროცესს, რომლის იმედიც ამ ქვეყნის მოქალაქეებს აქვთ, როდესაც ჩვენი ქვეყნის უახლოეს მომავალზე ფიქრობენ. ძნელი წარმოსადგენია, როგორ განვითარდება მოვლენები მომავალში, თუმცა ეს ნაბიჯი კრიზისს კიდევ უფო მეტად გააღრმავებს და პოლიტიკური დესტაბილიზაციის კარგ საფუძველს ქმნის, რომ არაფერი ვთქვათ საერთაშორისო რეაქციებზე, რომელიც, დარწმუნებული ვარ, საკმაოდ უსიამოვნო იქნება", — ამბობს მენაბდე.

რამდენიმეთვიანი პოლიტიკური კრიზისის შემდეგ ევროკავშირის მედიაციითა და შარლ მიშელის პირადი ჩართულობით მიღწეული შეთანხმება ანულირებულია. ეს გადაწყვეტილება მმართველმა გუნდმა მიიღო, ბრალი კი ტრადიციულად ოპოზიციას დასდო. შესაბამისად, ქართული ოცნება უარს ამბობს აქამდე დაპირებულ 43%-იან ბარიერზე და აცხადებს, რომ ახალი არჩევნები მათი "კეთილი ნებით" 53%-ის მიღების შემთხვევაში ჩატარდება, თუ გადაწყვეტენ, რომ ოპოზიცია მზად არის კოალიციური მმართველობისთვის. შარლ მიშელის შეთანხმების ერთ-ერთი მთავარი ჩანაწერი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.