"სად მაკოცებ?", "მარტო შემხვდები?", "ფოტო მანახე" — ამ და სხვა შეტყობინებებს უგზავნიდა, სავარაუდოდ, 33 წლის კაცი ქალს, რომელიც 13 წლის ბავშვი ეგონა. პირადი მიმოწერის ამსახველი ფოტოები Facebook-ზე თიკო კვალიაშვილმა გაავრცელა. ფოტოებში ჩანს, როგორ ცდილობს კაცი საუბარში გამოიწვიოს ადამიანი, რომელიც 13 წლის ბავშვი ეგონა.

როგორც თიკომ On.ge-ს უთხრა, მისმა დამ, რომელიც სრულწლოვანია, უცნობი პირისგან შეტყობინება მიიღო და თავდაპირველად ეგონა, რომ მეგობარი ეხუმრებოდა, ამიტომ თავადაც უპასუხა. თუმცა, დიალოგის დროს მიხვდა, რომ შესაძლოა, საქმე პედოფილთან ჰქონოდა, ამიტომ ასაკი მოატყუა და საუბარი გააგრძელა, როგორც 13 წლის ბავშვმა. ამის მიუხედავად, კაცი არ გაჩერებულა და ფოტოებს ითხოვდა.

"ასაკის თქმასთან ერთად ამ პიროვნების საუბარი უფრო სექსუალური შინაარსის გახდა — როდის შემხვდები, სად მაკოცებ და რაღაცები. ჩემი და მიხვდა, რომ აქ მთლად სუფთად არ იყო საქმე, ამიტომ, გადაწყვიტა გამოეძიებინა ეს პიროვნება და სთხოვა, რომ გამოეგზავნა სელფები სხვადასხვა სიტუაციაში. ჩემმა დამ გაუგზავნა ინტერნეტში მოძიებული ბავშვის სურათი, თითქოს ის იყო.

ის პიროვნება სთხოვდა, შენი დაქალების, ანუ 13-14 წლის ბავშვების სურათებიც გამომიგზავნეო. ყოველივე ამის შემდეგ, ჩემმა დამ აღარ გააგრძელა მასთან საუბარი, ყველაფერი ამოიღო და მომმართა მე, რადგან მაქვს სამართალდამცველებთან ურთიერთობის გამოცდილება", — გვიყვება თიკო.

უცნობი პირი თიკოს დას ირაკლის სახელით გაეცნო. მას შემდეგ, რაც თიკოს დამ ასაკი "გაუმხილა" და მისწერა, რომ 13 წლის იყო, მან ფოტოების გაგზავნა სთხოვა. ფოტოს გაგზავნის შემდეგ კი სწერდა, რომ ლამაზი იყო, აკოცებდა და ჰკითხა, ჩაეხუტებოდა თუ არა; ასევე ჰკითხა, უშვებდნენ თუ არა სახლიდან მარტოს და ცდილობდა, შეხვედრაზე დაეთანხმებინა; სწერდა, რომ მის გვერდით უნდოდა ყოფილიყო და ეუბნებოდა, არ შეგეშინდესო; კაცი ცდილობდა ბავშვი დაერწმუნებინა, რომ მისი გაგზავნილი ფოტოები არავისთვის ეჩვენებინა, პარალელურად კი ეკითხებოდა, მოეწონა თუ არა. ასევე ჰკითხა, მოსწონდა თუ არა დიდი ბიჭები. თიკოს დამ მას რამდენიმე სიტუაციური ფოტო გამოაგზავნინა, საიდანაც ცხადი ხდება, რომ კადრებზე რეალური პიროვნებაა. მაგალითად, ჯერ სთხოვა გაეღიმა და ისე გამოეგზავნა ფოტო, შემდეგ კი ენა გამოეყო. 13 წლის ბავშვის ფოტოების მოლოდინით, კაცმა თიკოს დას თავისი ფოტოები გადაუგზავნა, სადაც ის იდენტიფიცირებადია.

თიკომ პოლიციასაც მიმართა, რის შემდეგაც გამოძიება დაწყო. პირი, რომელიც, მისი აზრით, 13 წლის ბავშვს ფოტოებს უგზავნიდა, კოცნას და შეხვედრას სთხოვდა, ამ დროისთვის იდენტიფიცირებული და შესაბამისად, დაკავებული არ არის. თუმცა შსს-ს უკვე აქვს მინიმუმ სამი ფოტო, სადაც მისი სახე ჩანს, ასევე, იცის მისი ანგარიში Facebook-ზე. უწყებაში On.ge-ს უთხრეს, რომ საქმეზე გამოძიება სისხლის სამართლის კოდექსის 141-ე მუხლით დაიწყო, რაც გარყვნილ ქმედებას გულისხმობს.