შინაგან საქმეთა სამინისტროს ინფორმაციით, ე.წ. ქურდულ სამყაროსთან კავშირისთვის დააკავეს 27 პირი, 4-ს კი ბრალი ციხეში წარუდგინეს. მოსამართლის განჩინების საფუძველზე ორი მათგანი პოლიციამ თბილისში, 27 ივლისს დააკავა. გამოძიების ცნობით მათ კავშირი ჰქონდათ 8 ივლისს დაკავებულ 25 პირთან.

"გამოძიებით დადგინდა, რომ ორივე ბრალდებული აღიარებდა ქურდულ სამყაროს და აქტიური კავშირი ჰქონდა ქურდული სამყაროს სხვა წევრებთან. ასევე დადგენილია, რომ თ.ჭ. და ი.გ. აქტიურად მონაწილეობდნენ ე.წ. ქურდული სამყაროს საქმიანობაში იმ პირებთან ერთად, რომლებიც ქვემო ქართლის პოლიციის დეპარტამენტისა და რუსთავის რაიონული პროკურატურის თანამშრომლების მიერ ერთობლივად ჩატარებული ექვსთვიანი კომპლექსური ოპერატიული და საგამოძიებო ღონისძიებების შედეგად, მიმდინარე წლის 8 ივლისს იქნენ დაკავებული", — ვკითხულობთ უწყების მიერ გავრცელებულ განცხადებაში.

დაკავებულები ამჟამად პენიტენციურ დაწესებულებაში არიან მოთავსებული. დანაშაულები 7-დან 10 წლამდე ვადით თავისუფლების აღკვეთას ითვალისწინებს.