ქართული ოცნების აღმასრულებელი მდივნის, მამუკა მდინარაძის განცხადებით, ოპოზიცია, კონკრეტულად კი ნაციონალური მოძრაობა TV პირველის ოპერატორის, ლექსო ლაშქარავას გარდაცვალებას იყენებს საკუთარი პოლიტიკური მიზნების მისაღწევად.

"გავა ექვსი თვე და სამწუხაროდ, შეიძლება, არცერთმა მათგანმა, როგორც დღეს გაყალბებულ არჩევნებს არ ახსენებენ, არ ახსენონ, აღარ ახსენონ სანდრო ლაშქარავა. იმიტომ, რომ მათთვის, რაც არ უნდა ჩემთვის რთული სათქმელი იყოს, ეს მხოლოდ ხერხია, იარაღია, მათი ამორალური კამპანიის ნაწილია, მათი მიზნის მიღწევის საშუალებაა, მათი სახეა ეს კამპანია, როდესაც გარდაცვლილი ადამიანის ტრაგედიას და ოჯახის ტრაგედიას იყენებენ მათი, ძალიან ცუდი, არ მინდოდა მეთქვა, მაგრამ, ბინძური პოლიტიკური მიზნებისათვის", — განაცხადა მამუკა მდინარაძემ.

მდინარაძემ თქვა, რომ ლაშქარავას გარდაცვალების საქმეზე საპარლამენტო ტრიბუნიდან საუბარს ერიდება, თუმცა მაინც აღნიშნა, რომ "ყველამ იცის, რასთან არის დაკავშირებული".

"დღეს გვთავაზობენ ამორალურ კამპანიას, როდესაც ისინი პირდაპირ უკავშირებენ კამპანიას ხელისუფლებას ჟურნალისტის გარდაცვალებას. ადამიანის გარდაცვალებას, რომელიც, მაღალი ალბათობით, ალბათ, ყველამ იცით, რასთან არის დაკავშირებული. თუმცა, ამაზე ჩვენც კი ვერიდებით ტრიბუნიდან საუბარს. იმიტომ, რომ ჩვენ კიდევ ვუფრთხილდებით რაღაცებს. ამის შესახებ, ჟურნალისტებმაც კარგად იციან. იმ კულუარული ინფორმაციების შესახებაც კარგად იციან, რა არ ვიკადრეთ და რაზე შევიკავეთ თავი ბოლო დღეების განმავლობაში, მათ შორის, ესეც კარგად იციან, მაგრამ, ნაციონალური მოძრაობა მაინც შესაბამის დავალებებს გასცემს", — განაცხადა მამუკა მდინარაძემ.

5 ივლისს, ჰომოფობიური და ძალადობრივი ჯგუფების თავდასხმის შედეგად 53 ჟურნალისტი დაშავდა. მათგან ერთი TV პირველის ოპერატორი, ლექსო ლაშქარავა 11 ივნისს გარდაიცვალა. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და 10 ივლისს სახლში გაეწერა.

ალექსანდრე ლაშქარავასა და ჟურნალისტ მირანდა ბაღათურიას ძალადობრივი კონტრაქციის მონაწილეები თავს მოძრაობა სირცხვილიას ოფისში შეჭრის მცდელობისას დაესხნენ. ლაშქარავა ჯერ კიდევ საავადმყოფოში იმყოფებოდა, როცა On.ge-ს შემთხვევის დეტალები მოუყვა.

"უბრალოდ კიბეზე შეგვეფეთნენ, ჟურნალისტზე გაიწიეს ჯერ და შემდეგ ჩამქოლეს. არ ვიცი, 50 კაცი მირტყამდა, მთელი კიბის საფეხური, ზედა ნაწილი, ქვედა ნაწილი. რაღაც ნაწილი ავიდა ზევით, დავიწყე გაყოლა. რამდენიმე სართულზე იყვნენ ესენი, რამდენიმე სართულმა მცემა. ჩამაგდეს, ქვევით გადამაგდეს და ისე მცემეს, ტექნიკა დააქუცმაცეს, არ ვიცი, ასეთი შთაბეჭდილება მრჩება, რომ უნდოდათ მედია გამოეყვანათ მწყობრიდან [...]

ახლა მე მეძახიან ამოცნობაზე მოდიო, მაგრამ ორი დღე კიდევ აქ უნდა ვიყო, ვერ გავდივარ და იდენტიფიცირება წარმოუდგენელია მოვახდინო, იმიტომ, რომ 50-60 ადამიანი იყო", — ყვებოდა ლაშქარავა 6 ივლისს, თავდასხმიდან მეორე დღეს.

მისი გარდაცვალებიდან მეორე დღესვე შინაგან საქმეთა სამინისტომ სპეციალური ბრიფინგი გამართა, სადაც თქვეს, რომ შუალედური ექსპერტიზის მიხედვით, გარდაცვალების მიზეზი შესაძლოა გამხდარიყო ზედოზირება. ამავე დღეს მათ გაავრცელეს ვიდეომასალა, სადაც, მათივე განმარტებით, ჩანს ლაშქარავას გადაადგილების მარშრუტი გარდაცვალების წინა დღეს, ანუ 10 ივლისს. უწყებაში ამბობენ, რომ გარდაცვალებამდე ერთი დღით ადრე ლაშქარავა ორჯერ მივიდა ფონიჭალის დასახლებაში. 18 ივლისს, შსს-მ გაავრცელა განცხადება, რომ დააკავეს პირი, რომელმაც, უწყებუს ვერსიით, ლექსო ლაშქარავას ნარკოტიკი მიჰყიდა.

ლექსო ლაშქარავას კოლეგებსა და ოჯახს ამ ვერსიის არ სჯერა. მათ საქმეში დამოუკიდებელი ექსპერტი ჩართეს და საქმის გამჭვირვალედ და ეფექტიანად გამოძიებას ითხოვენ.