დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელი, ამირან გამყრელიძე დამსაქმებლებს რეკომენდაციით მიმართავს და სთხოვს, აცრის შემდეგ თანამშრომლებს მისცენ ერთი ან ორი დღე დასვენებისთვის. ამის შესახებ გამყრელიძე ვაქცინაციის წამახალისებელ ღონისძიებებზე საუბრისას განაცხადა.

"აუცილებელია, რომ აცრის შემდეგ ადამიანს მიეცეს ერთი ან ორი გამოსასვლელი დღე [...] ეს დამოკიდებულია დამსაქმებლებზე. ეს არის მხოლოდ რეკომენდაციები. ეს არ დგინდება დადგენილებით. ამიტომ, დამსაქმებლებმა უნდა უზრუნველყონ და ამიტომ, ჩვენ ვთხოვთ დამსაქმებლებს, რომ მეტი წახალისება მისცენ აცრებს. მათ შეიძლება ბევრი რამე მოიფიქრონ ამასთან მიმართებაში", — განაცხადა გამყრელიძემ.

მან მაგალითად სწორედ დაავადებათა კონტროლისა და საზოგადოებრივი ჯანმრთელობის ეროვნული ცენტრი მოიყვანა და აღნიშნა, რომ მის თანამშრომლებს აქვთ შესაძლებლობა აცრის შემდეგ 2 დღე დაისვენონ. სწორედ ამას უკავშირებს გამყრელიძე ვაქცინირებულთა პროცენტულად მაღალ რაოდენობას NCDC-ში.

"დაავადებათა კონტროლის ცენტრში მე, მაგალითად, გამოსასვლელ დღეს ვაძლევ ორ დღეს იმ ადამიანებს, ვინც იცრებიან. დაავადებათა კონტროლის ცენტრში მომუშავე ადამიანების 61% დღეს აცრილია და გვინდა, რომ აგვისტოს ბოლოსთვის ავიდეთ 80-85%-ზე", — ამბობს გამყრელიძე.

მან ისაუბრა იმაზეც, რა სახის წამახალისებელი ღონისძიებები შეიძლება დაიგეგმოს მომავლისთვის.

"მიღებული პრაქტიკაა სხვადასხვა ლატარიების გათამაშება და შესაბამისად, წამახალისებელი ღონისძიებები. იგივე ორჯერადად აცრილებისთვის გარკვეული შეღავათები, რომ ისინი უფრო ადვილად მიიღებენ სხვადასხვა ღონისძიებებში მონაწილეობას და ბევრი სხვა", — ამბობს ამირან გამყრელიძე.

გაიგე მეტი: