ჯანდაცვის მინისტრის, ეკატერინე ტიკარაძის განცხადებით, ვაქცინაციის პორტალზე გარკვეული დეტალები იცვლება, რაც საიტის გამართულად მუშაობას უზრუნველყოფს. ამათგან ერთ-ერთია რეგისტრაციის მეთოდის ცვლილება, რის მიხედვითაც წინასწარი ჯავშნების შესახებ მოქალაქეებს საბოლოო დასტური 24 საათის განმავლობაში მიუვათ.

"ამ კომპონენტშიც IT სამსახურის რეკომენდაციები იქნა გათვალისწინებული, ვინაიდან თქვენ როგორც იცით, აქ მონაწილეობს რამდენიმე ბაზა, როდესაც ადამიანი რეგისტრირდება. პროგრამაში იყო დაშვებული რამდენიმე შეცდომა, რომელიც გულისხმობდა იმას, რომ რამდენჯერმე ხდებოდა თითოეულ პროგრამასთან მიმართვიანობა და ეს, რა თქმა უნდა, გამტარუნდარიანობას აფერხებდა. ახლა ეს არის იმ კანონზომიერებით, რაც უზრუნველყოფს გამტარუნარიანობას და ასევე, უქმნის კომფორტს IT სამსახურს, რომ ყველანაირი შეცდომის გარეშე, ვინაიდან რამდენჯერმე მისდიოდათ მესიჯი და მესიჯები იყო არეული და გაურკვეველი იყო დრო, ეს არ განმეორდეს, გადაზუსტებული ინფორმაცია მიუვათ ჩვენს მოქალაქეებს", — ამბობს მინისტრი.

მისი თქმით, ცვლილება მოიცავს, ასევე, იმას, რომ ვაქცინაციის რეგისტრაციის ელექტრონული პორტალის გამტარუნარიანობა მნიშვნელოვნად გაზრდილია.

"კოვიდ-19-ის საწინააღმდეგო ვაქცინაციისთვის რეგისტრაციის ელექტორნული მოდული განახლებულია და მისი გამტარუნარიანობა არის მნიშვნელოვნად გაზრდილი. ამაზე განვმარტავ, რომ პირველი რეგისტრაციის დროს IT სამსახურმა დააფიქსირა, რომ 12 000 ჯავშანზე მოდიოდა 120 000 მსურველი და რა თქმა უნდა, იქიდან გამომდინარე, რომ მიწოდება იყო შეზღუდული, ამან გამოიწვია ის შეფერხებები საიტზე, რომელიც ჩვენ გვქონდა პირველი დოზების დარეგისტრირების დროს", — თქვა მინისტრმა.

ფაიზერის მეორე დოზაზე რეგისტრაცია დღეს, 23 ივლისს დაიწყო.