ისრაელის მთავრობის გადაწყვეტილებით, 30 ივლისიდან საქართველო შედის წითელი ქვეყნების სიაში, სადაც ისრაელელი ვიზიტორებისთვის გამგზავრება ნებადართული აღარ იქნება. ამის შესახებ ინფორმაციას საქართველოში ისრაელის საელჩო ავრცელებს.

"აღნიშნული სტატუსის გადახედვა მოხდება ყოველკვირეულად და საქართველოში ეპიდემიოლოგიური მდგომარეობის გაუმჯობესების შემთხვევაში, შესაბამისი შეზღუდვები შემცირდება, ან მოიხსნება", — აღნიშნულია განცხადებაში.

ამასთან, შეზღუდვა გამონაკლის შემთხვევებზე არ გავრცელდება. თუმცა, არ არის დაკონკრეტებული, გამონაკლისად რა ჩაითვლება.

ისრაელს აქვს მწვანე — უსაფრთხო და წითელი — მაღალი კოვიდრისკის მქონე ქვეყნების სიები, რომლებთანაც მოგზაურობა შესაბამისად დაშვებული ან შეზღუდულია. სიები ყოველ კვირა კოვიდსიტუაციიდან გამომდინარე ახლდება. ისრაელის ჯანდაცვის სამინისტროს გადაწყვეტილებით, ისრაელის მოქალაქეებმა და ქვეყანაში მუდმივმა მაცხოვრებლებმა, რომელთაც სურთ COVID-19 ინფიცირების ყველაზე მაღალი რისკის მქონე ქვეყნებში გამგზავრება, ნებართვა უნდა აიღონ გამონაკლისების კომიტეტისგან, რომელიც ნებართვას ინდივიდუალური ქეისის საჭიროებების შესწავლის საფუძველზე გასცემს. ამასთან, ყველა იმ მგზავრისთვის, ვინც ისრაელში ამ მაღალი რისკის ქვეყნებიდან ჩადის, სავალდებულია იზოლაცია, მათ შორის გამოჯანმრთელებული და ვაქცინირებული პირებისთვის.

ტურიზმის ეროვნული ადმინისტრაციის ინფორმაციით, ივნისში საქართველოში შემოსული ვიზიტორების რაოდენობის მიხედვით ისრაელი მეორე ადგილზე იყო, თურქეთის შემდეგ.