მთავარი არხის დირექტორის, ნიკა გვარამიას განცხადებით, კულტურის მინისტრის, თა წულუკიანის ქმედებაზე ტელეკომპანია აუცილებლად მიმართავს პროკურატურას და ჯობს წულუკიანმა მიკროფონი დააბრუნოს.

"ეს საქციელი არის ორი დანაშაულის შემცველი. ერთი ეს არის ძარცვა, პირდაპირ ღია ძარცვა, მეორე არის ჟურნალისტურ საქმიანობაში ხელშეშლა. ორივე ერთად საკმაოდ ბევრ წელს ითვალისწინებს სასჯელაღსრულებით დაწესებულებაში და ქალბატონო წულუკიანო, ჩვენ მივმართავთ აუცილებლად პროკურატურას ამ მიკროფონის ძარცვის გამო, ჟურნალისტური საქმიანობის ხელშეშლის გამო, ჯერ კიდევ არ დაბრუნებულა ეს მიკროფონი, ამიტომ სჯობს, რომ დაუყოვნებლივ დააბრუნოთ ეს მიკროფონი იმიტომ, რომ ამ დანაშაულების ხანდაზმულობა გავრცელდება მათ შორის იმ დროზე, როცა თქვენ მინისტრი არ იქნებით და ნამდვილად არ გისურვებთ, რომ საკუთარი წლები სასჯელაღსრულების დაწესებულებაში გაატაროთ თან ასეთი კომიკური მიზეზით", — აცხადებს გვარამია მთავარი არხის ეთერში.

ვიცე-პრემიერმა და კულტურის მინისტრმა, თეა წულუკიანმა, მთავარი არხის ჟურნალისტს, ემა გოგოხიას მიკროფონი წაართვა და აცხადებს, რომ არ დააბრუნებს. მთავარი არხის მიერ გავრცელებულ ვიდეოში ჩანს, როგორ ართმევს წულუკიანი ჟურნალისტს მიკროფონს, რომელიც კითხვას სვამს. ამის შემდეგ მინისტრი ამ მიკროფონით იწყებს საუბარს და ბიძინა ივანიშვილს მადლობას უხდის. ამის შემდეგ წულუკიანი ჟურნალისტს ეუბნება: "ემა, მოდი, აბა თქვი, ბიძინას გაუმარ...". გარდა ამისა, თეა წულუკიანმა Facebook-ზე გამოაქვეყნა ფოტო და წერს, რომ ამიერიდან გაკეთებული საქმეების შესახებ ამ მიკროფონით უნდა "გვაუწყოს". წულუკიანის აზრით, ჟურნალისტი განაიარაღა.

საქართველოს ახალგაზრდა იურისტთა ასოციაციის თავმჯდომარე On.ge-სთან განმარტავს, რომ კულტურის მინისტრის ქმედება შესაძლოა შეიცავდეს სისხლის სამართლის კოდექსის 154-ე მუხლით გათვალისწინებულ დანაშაულის ნიშნებს. ეს მუხლი ჟურნალისტურ საქმიანობაში უკანონო ხელის შეშლას გულისხმობს. ამასთან, ნიკა სიმონიშვილის განცხადებით, თუ წულუკიანი მიკროფონის დაბრუნებას არ აპირებს, გამოძიების დაწყება საკუთრების წინააღმდეგ მიმართული დანაშულისთვისაც შესაძლებელია.

როგორც გოგოხია ამბობს, საპატრულო პოლიციის თანამშრომლებმა უთხრეს, რომ საქმე არა მათი, არამედ კრიმინალური პოლიციის კომპეტენცია იყო, დაემშვიდობნენ და წავიდნენ.

შინაგან საქმეთა სამინისტროში ჯერ კიდევ არ იციან, დაიწყო თუ არა გამოძიება კულტურის მინისტრის, თეა წულუკიანის, მიერ მთავარი არხის ჟურნალისტისთვის მიკროფონის წართმევის ფაქტზე.

გაიგე მეტი: