ავსტრალიური იურიდიული ფირმა LHD-ს ადვოკატი, ჯერი სკინერი, რომელიც ევროპის ადამიანის უფლებათა დაცვის სასამართლოში მალაიზიის ავიახაზების ჩამოგდებისას დაღუპულთა ნათესავებს წარმოადგენს, ვლადიმერ პუტინისთვის $330 მილიონიანი გადასახადის დაკისრებას ითხოვს.

მისი თქმით, პუტინთან პირადი ანტიპათია არ აქვს, მაგრამ თვლის, რომ რუსეთის ფედერაციის პრეზიდენტს, სახელმწიფოს მჭიდრო და მკაცრი კონტროლის გამო, თვითმფრინავის ჩამოგდებისთვის პასუხისმგებლობა უნდა დაეკისროს:

“რუსეთში არაფერი ხდება მისი პირდაპირი ბრძანებისა და თანხმობის გარეშე. შესაბამისად, ის ამ პასუხისმგებლობას უნდა იზიარებდეს.”

ადვოკატის განცხადებით, მას მოწმეთა ჩვენებები, ვიდეო და ფოტო მასალა, რადარის მონაცემები და საჰაერო კონტროლის ჩანაწერები აქვს, რომლებსაც სამხილებად გამოიყენებს.

“ეს მასალა ჩემთვის ხელმისაწვდომია, მე თავდაჯერებულად შემიძლია გითხრათ, რომ რუსების პირდაპირი მონაწილეობა რომც არ დამტკიცდეს, ეს მოვლენა მთლიანად რუსეთის კისერზეა”, განაცხადა მან.

LHD 33 დაზარალებულს წარმოადგენს, თითოეული მათგანი $10 მილიონის ანაზღაურებას ითხოვს.

ჯერი სკინერს მსგავს პროცესში მონაწილეობის გამოცდილება უკვე აქვს. ის 1988 წელს, Pan Am Flight 103-ის საქმეზე წარმოადგენდა დაზარალებულებს. ტრაგედია, რომელიც ლოკერბის აფეთქების სახელითაა ცნობილი, ლიბიელ ტერორისტებს უკავშირდება. 1988 წელს, ფრანკფურტი-ლონდონი-ნიუ-იოკრი-დეტროიტის რეისი შოტლანდიის თავზე, ქალაქ ლოკერბისთან ახლოს, ბომბის აფეთქების შედეგად ჩამოვარდა, რა დროსაც 259 ადამიანი დაიღუპა. გამოძიების შედეგად, ტერორისტების კვალს ლიბიაში მიაკვლიეს. გაეროსთან შეთანხმების საფუძველზე მუამარ კადაფიმ დამნაშავეები საერთაშორისო სასამართლოს გადასცა, ხოლო 2003 წელს მან დაზარალებულების სასარგებლოდ თანხაც გადაიხადა - მიუხედავად იმისა, რომ, მისი თქმით, აფეთქებასთან კავშირი არ ჰქონია.

რუსეთისა და პუტინის წინააღმდეგ შეტანილ სარჩელს ავსტრალიის ხელისუფლებაც გამოეხმაურა. ქვეყნის საგარეო საქმეთა მინისტრის თქმით, სახელმწიფო დაზარალებულებს ბოლომდე დაუდგება გვერდში და დამნაშავეთა დასჯისთვის ყველაფერს გააკეთებს.

მალაიზიის ავიახაზების რეისი MH17, 2014 წლის 17 ივლისს, უკრაინის ტერიტორიაზე, რუსეთის მხარდაჭერილი სეპარატისტების კონტროლირებულ ტერიტორიაზე ჩამოაგდეს. თვითმფრინავს ბუკის ტიპის რაკეტა ესროლეს, შედეგად 298 მგზავრი დაიღუპა.