კანზასის ქალაქ ჰესტონში მსროლელმა 3 ადამიანი მოკლა. 14 დაჭრილი საავადმყოფოშია გადაყვანილი. ინფორმაციას BBC ადგილობრივ პოლიციაზე დაყრდნობით ავრცელებს.

26 თებერვალს, საღამოს 5 საათისთვის გაზონის საჭრელი მანქანების ქარხანაში ერთ-ერთმა დასაქმებულმა თანამშრომლებს ცეცხლი გაუხსნა.

38 წლის ქედრიქ ფორდი, რომელსაც თანამშრომლები მშვიდ და გაწონასწორებულ ადამიანად ახასიათებენ, ადგილზე მისულმა პოლიციამ გაქცევის მცდელობის დროს მოკლა.

ქარხნის ერთ-ერთი თანამშრომელი იხსენებს, რომ ის ფორდის ბოლო მსხვერპლი უნდა ყოფილიყო, თუმცა თავდამსხმელს ტყვიები გაუთავდა და გაქცევა დააპირა. სწორედ ამ დროს მოკლა ის სამართალდამცველმა.

შემთხვევამდე რამდენიმე დღით ადრე, თავდამსხმელი ფეისბუქზე AK-47-თან (კალაშნიკოვი) გადაღებულ საკუთარ სურათებს აქვეყნებდა. სწორედ ამ იარაღით მოკლა ფორდმა მოქალაქეები.

ამერიკის შეერთებულ შტატებში მომხდარმა მასობრივმა სროლის შემთხვევებმა, იარაღის კონტროლის საკითხი, საპრეზიდენტო არჩევნებში მონაწილეთა კამპანიებში ერთ-ერთ მთავარ თემად აქცია.