საქართველოს კულტურის სამინისტრო შალვა ამირანაშვილის სახელობის ხელოვნების სახელმწიფო მუზეუმის შენობის დანგრევასთან დაკავშირებულ გავრცელებულ ინფორმაციას სიცრუეს უწოდებს. სამინისტროს განცხადებით, "სიცრუის ავტორები და მათ ზურგს ამოფარებული სხვა პირები ამ გზით საკუთარი უმოქმედობით გამოწვეული სავალალო შედეგების გადაფარვას ცდილობენ".

"კერძოდ, სწორედ ამ ცრუ ინფორმაციის გამავრცელებელი არხის მესვეურებსა და სოციალურ ქსელებში გამოთქმული ყალბი აღშფოთების ავტორებს, როდესაც იყვნენ ხელისუფლებაში და ებარათ კულტურული მემკვიდრეობის ძეგლის მოვლა-პატრონობა, არაფერი გაუკეთებიათ იმისთვის, რომ მუზეუმის შენობა (ისევე, როგორც კულტურული მემკვიდრეობის ბევრი სხვა ძეგლი) გადაერჩინათ.

სამინისტრო მუზეუმს კი არ ანგრევს, მუზეუმი ინგრევა სიცრუის ავტორების უმოქმედობისა და მათ მიერ პუშკინის ქუჩის მხრიდან ესტაკადის ისე მოწყობის შედეგად, რომ მუზეუმის შენობის ერთი ნაწილი გადაიქცა. ასევე, მუზეუმის შენობა სამწუხაროდ ვეღარ აკმაყოფილებს ელემენტარულ სეისმური მედეგობის სტანდარტებს", — ნათქვამია კულტურის სამინისტროს მიერ გავრცელებულ განცხადებაში.

სამინისტროს ცნობით, მიმდინარე წლის ივლისში მათი დაკვეთით ჩატარებული ექსპერტიზის დასკვნის თანახმად, მუზეუმის შენობა უმძიმეს მდგომარეობაშია. კერძოდ, უწყება ამბობს, რომ:

• ლადო გუდიაშვილის ქუჩის გასწვრივ მდებარე შენობის ფლიგელის გამაგრება ძალიან დიდ ტექნიკურ სირთულეებთან და დანახარჯებთან იქნება დაკავშირებული და მისი გაძლიერება, სავარაუდოდ, რენტაბელური არ იქნება;
• ალექსანდრე პუშკინის ქუჩის გასწვრივ მდებარე ფლიგელზე განვითარებულია მზიდი კონსტრუქციების დიდი გადახრები, დეფორმაციები და რღვევები, რის გამოც შენობის ამ ნაწილის შენარჩუნება და გაძლიერება შეუძლებელია;
• შენობის მხოლოდ ცენტრალური შესასვლელის გაძლიერება არის შესაძლებელი;
• შენობის ქვეშ მიმდინარეობს ფუძე-გრუნტების გაწყლოვანება ტექნოგენური და ატმოსფერული წყლების ჩამოდინებისაგან;
• შენობას არც სართულშუა გადახურვის და არც სახურავის დონეებზე არ გააჩნია ანტისეისმური სარტყლები, რის გამოც ის არ აკმაყოფილებს სეისმურობის ელემენტარულ სტანდარტებს.

უწყებაში ამბობენ, რომ "სწორედ ამ უმძიმესი მდგომარეობიდან გამომდინარე", მუზეუმის თანამშრომლებისთვის უსაფრთხო სამუშაო გარემოს შექმნისა და მუზეუმში დაცული უნიკალური ფონდების გადასარჩენად თეა წულუკიანმა 15 ივლისს დაამტკიცა მუზეუმში მართვის განსაკუთრებული რეჟიმი, მუზეუმში დასაქმებული თანამშრომლების უსაფრთხო ადგილას გადაყვანისა და ფონდების ევაკუაციის სამოქმედო გეგმა, რომელიც "სამინისტრომ მაშინვე გახადა საჯარო".

"სწორედ ამ გეგმის თანახმად აპირებს სამინისტრო მუზეუმში დაცული უნიკალური ექსპონატების გადარჩენას და არა მუზეუმის დემონტაჟს, როგორც ეს ცრუ ინფორმაციის გამავრცელებელ სიუჟეტში იყო ნათქვამი", — აცხადებს კულტურის სამინისტრო და განცხადებას ფოტომასალასაც ურთავს.

ხელოვნების მუზეუმის დანგრევასთან დაკავშირებით სიუჟეტი მთავარმა არხმა მოამზადა. ტელეკომპანია მასალაში კულტურის მინისტრის განცხადებას ეყრდნობა, სადაც ის ამბობს:

"ფლიგელის გამაგრება დაკავშირებული იქნება ძალიან დიდ ტექნიკურ სირთულეებთან, ვციტირებ, და დანახარჯებთან. მისი გაძლიერება, სავარაუდოდ, არ იქნება რენტაბელური".