დეპუტატ სალომე სამადაშვილის თქმით, აშშ-ს სახელმწიფო დეპარტამენტის ანგარიში, სადაც საუბარია ქართული სასამართლო სისტემის მიმართ მზარდ უნდობლობაზე, არის პირდაპირი სიგნალი ინვესტორებისთვის, რომ თავი შეიკავონ ჩვენს ქვეყანაში ივნესტირებისგან.

"ეს, შეიძლება ითქვას, რომ არის პირველი დოკუმენტი, რომელსაც ეცნობა ნებისმიერ ადამიანი, ნებისმიერი პოტენციური ინვესტორი, რომელსაც აინტერესებს ჩვენს ქვეყანასთან რაიმე საქმიანი ურთიერთობების დამყარება.

როდესაც ასეთ დოკუმენტში წერია პირდაპირ, რომ ქვეყანაში არ არსებობს დამოუკიდებელი სასამართლო, ქვეყანაში არის ელიტური კორუფცია, რაც იმას ნიშნავს, რომ რეალურად, ბიზნესს ამ ქვეყანაში ვერ აწარმოებ, ინვესტიციას ვერ ჩადებ, თუ არ შეხვალ კორუფციულ გარიგებაში, ეს არის პირდაპირ სიგნალი ყველა პოტენციური ინვესტორისთვის, რომ ამ ქვეყანაში, ჩვენს სახელმწიფოში ინვესტირება არ არის მიზანშეწონილი [...] ეს ნიშნავს გაზრდილ სიღარიბეს, გაზრდილ უმუშევრობას, სრულ უპერსპექტივობას", — განაცხადა სალომე სამადაშვილმა.

აშშ-ს სახელმწიფო დეპარტამენტის განცხადებით, საქართველოში ინვესტორების მხრიდან სასამართლო სისტემის მიმართ უნდობლობა მზარდია. ამის შესახებ იმ ანგარიშშია საუბარი, რომელშიც საქართველოს საინვესტიციო კლიმატია შეფასებული. თუმცა, იქვე აღნიშნულია, რომ მიუხედავად გამოწვევებისა, საქართველო ბიზნესის კეთების მხრივ რეგიონში ერთ-ერთ მოწინავე ადგილზე რჩება.