საქართველოში ამერიკის შეერთებული შტატების ელჩის განცხადებით, იმედგაცრუებულია, რომ პრემიერმინისტრ ღარიბაშვილის ღონისძიებაზე ზოგიერთი მედია არ მიიწვიეს.

"მედიის თავისუფლება ძალიან მნიშვბელოვანია და ნებისმიერ პასუხისმგებლიან მედიას უნდა ჰქონდეს შესაძლებლობა, მოსახლეობას მიაწოდოს ინფორმაცია, რათა ისინი იყვნენ სრულად ინფორმირებულნი. იმედგაცრუებული ვარ, რომ არ ეძლევა საშუალება", — განაცხადა მან.

დღეს, 17 ივლისს, პრემიერმინისტრი ღარიბაშვილი მახათას მთაზე იმყოფებოდა, თუმცა პრესსამსახურმა ღონისძიების შესახებ ინფორმაცია კრიტიკულ მედიას დაუმალა. მოგვიანებით მთავრობის ადმინისტრაციამ პირდაპირ თქვა, რომ ამის მიზეზი მათი სარედაქციო პოლიტიკაა — პრესსამსახურის განმარტებით, "პრემიერმინისტრი ირაკლი ღარიბაშვილი თვლის, რომ მთავარმა არხმა, TV პირველმა და ფორმულამ გადაკვეთეს ყველანაირი წითელი ხაზი, ისინი წარმოადგენენ კონკრეტულ პოლიტიკურ პარტიას, ფინანსდებიან და პირდაპირ მართულები არიან მიხეილ სააკაშვილის და მისი რადიკალური ძალების მიერ და ჩართული არიან პოლიტიკურ კამპანიაში პრემიერმინისტრის წინააღმდეგ".

მას შემდეგ, რაც 5 ივლისს ძალადობრივი და ჰომოფობიური ჯგუფები მედიას ფიზიკურად გაუსწორდნენ, თავს დაესხნენ რამდენიმე მოქალაქეს და დაარბიეს ორგანიზაციების ოფისები, სახელმწიფომ კი მათ დასაცავად ფაქტობრივად არაფერი გააკეთა, მედიის წარმომადგენლებმა არაერთი აქცია გამართეს. 11 ივლისს გარდაიცვალა TV პირველის ოპერატორი, ლექსო ლაშქარავა, რომელსაც ძალადობრივმა ჯგუფებმა 5 ივლისს, სირცხვილიას ოფისის დარბევის მცდელობისას სცემეს. აქციები ამის შემდეგ უფრო აქტიური გახდა. მედია ითხოვს პრემიერმინისტრმა ირაკლი ღარიბაშვილმა მომხდარის გამო პოლიტიკური პასუხისმგებლობა აიღოს. ძალადობის ორგანიზატორები ამ დრომდე არ დაუკავებიათ, ღარიბაშვილი კი ჰომოფობიურ განცხადებებს აკეთებს. ასევე, ჟურნალისტები მიიჩნევენ, რომ ის ახალისებს ძალადობას.