ნებრასკას შტატის ქალაქ ლინკოლნში სწრაფი კვების ცნობილი ქსელის — Burger King-ის ფილიალის აბრაზე ერთ დილით უჩვეულო წარწერა შენიშნეს: "ყველანი წავედით. ვწუხვართ უხერხულობის გამო".

ინტერნეტში მალევე აღმოჩნდა ამის ამსახველი კადრები და ყველა დაინტერესდა, რა იმალებოდა ამ გზავნილის მიღმა. როგორც გაირკვა, წარწერა ამ ადგილობრივი რესტორნის ყოფილმა მენეჯერმა და სხვა თანამშრომლებმა დაუტოვეს ხელმძღვანელობას მას შემდეგ, რაც სამსახურიდან წასვლა ერთად გადაწყვიტეს.

როგორც ყოფილი მენეჯერი რეიჩელ ფლორესი ამბობს, მათი ეს გადაწყვეტილება მენეჯმენტის ზედა რგოლის წევრების დასაცინად გააკეთეს და ვერც კი წარმოედგინათ, თუ ამხელა ყურადღებას მიიქცევდნენ.

რეიჩელ ფლორესი ამერიკულ მედიასთან საუბარში აღნიშნავს, რომ მას მანამდეც ჰქონდა სხვადასხვა კვების ობიექტში მუშაობის გამოცდილება, მაგრამ როგორც კი Burger King-ის იმ კონკრეტულ რესტორანში გახდა მენეჯერი, სულ სხვაგვარ უსამართლობას გაუსწორა თვალი.

"ჩვენ უბრალოდ მართლა ძალიან დაგვღალა ხელმძღვანელობამ და ჩვენს დახმარების თხოვნებზე მათ მიერ გამოჩენილმა გულგრილობამ. როგორც კი მენეჯერი გავხდი, კიდევ უფრო შევიშალე: უცებ უამრავი სხვა ახალი უფროსი გამომიჩნდა", — აცხადებს ის.

რეიჩელი სამსახურიდან თანამშრომლების წასვლის კონკრეტულ მიზეზებსაც ასახელებს: შესასრულებელ სამუშაოსთან შედარებით თანამშრომლების არასაკმარისი რაოდენობა, ზეგანაკვეთური შრომა (მისი თქმით, კვირაში 50-დან 60 საათამდე უწევდათ მუშაობა) და გაუსაძლისი სამუშაო პირობების ატანა — სამზარეულოში გაგრილების სისტემა გაფუჭდა და არავის დაუპირებია მისი შეკეთება, მიუხედავად იმისა, რომ ზაფხულში ტემპერატურამ პიკს მიაღწია.

"ის გამოცდილება, რასაც ყოფილი თანამშრომლები აღწერენ, ჩვენი ბრენდის ღირებულებებს არ შეესაბამება. ჩვენი კომპანია შეისწავლის აღნიშნულ შემთხვევას, რათა დავრწმუნდეთ, რომ მსგავსი რა მომავალში აღარ განმეორდება", — განაცხადა Burger King-ის წარმომადგენელმა.