ტყიბულში მეშახტეების გაფიცვა შეწყდა. პროფკავშირების გაერთიანების წარმომადგენელმა, თამაზ დოლაბერიძემ, On.ge-ს განუცხადა, რომ მეშახტეებსა და კომპანიას შორის ბონუსის სისტემაზე შეთანხმება შედგა.

საქნახშირში აცხადებენ, რომ სამუშაო პროცესი სრულად აღდგა, ანაზღაურებასთან დაკავშირებულ ყველა საკითხს კი საკონსულტაციო საბჭოს სამუშაო შეხვედრებზე განიხილავენ.

"საწარმოს მუშაობა და საკონსულტაციო საბჭოს შეხვედრები მიმდინარე წლის ივნისის ბოლოს გაწერილი გრაფიკის მიხედვით მიმდინარეობს. შეხვერების პროტოკოლი ხელმისაწვდომი იქნება ყველა დაინტერესებული პირისთვის", — ნათქვამია საქნახშირის განცხადებაში.

ხელფასების გაზრდის მოთხოვნით ტყიბულში მეშახტეები 3 ივლისს გაიფიცნენ. მეშახტეების თქმით, მათი ხელფასი, პოზიციების მიხედვით, 450-800 ლარს შეადგენდა. საქნახშირში იმავე დღეს განაცხადეს, რომ გაფიცული მეშახტეებისთვის ხელფასების 300 ლარით გაზრდას არ განიხილავდნენ.

აღსანიშნავია, რომ ტყიბულის შახტში დასაქმებულები ადგილზე არსებულ სამუშაო პირობებს ხშირად აპროტესტებენ. მიმდინარე წლის თებერვალში ძიძიგურის სახელობის შახტის 9 მუშა პროტესტის ნიშნად შახტიდან არ ამოდიოდა. ისინი კომპანიის მხრიდან განახევრებული ხელფასების დარიცხვას აპროტესტებდნენ.

გასული წლის მარტში სამსახურებრივი მოვალეობის შესრულების დროს, 5 მეშახტე მოიწამლა. მეშახტეები მოწამვლას ძიძიგურისა და მინდელის სახელობის შახტების დამაკავშირებელ გვირაბში დაგროვილ მხუთავ აირებს უკავშირებდნენ.