თუ აქამდე თავდაცვის ტექნიკების შესწავლა აზრად არ მოგსვლიათ, ქვეყანაში მიმდინარე მოვლენები, დიდი ალბათობით, დაგარწმუნებდათ, რომ აღნიშნულ უნარს ნებისმიერი ადამიანი უნდა ფლობდეს. მოძალადის განიარაღება და მოგერიება ხშირად, სამწუხაროდ, სასიცოცხლოდ აუცილებელია, სწორედ ამიტომ სტუდია ლევიოსამ გადაწყვიტა, რომ მსურველებისთვის 25 ივლისს, საღამოს 8 საათზე თავდაცვის ტექნიკების პირველი, უფასო გაკვეთილი ჩაეტარებინა.

"5 ივლისს განვითარებული მოვლენების შემდეგ Facebook-ის ერთ-ერთ დახურულ ჯგუფში ძალიან ბევრმა ქალმა იკითხა, თუ სად შეიძლებოდა წიწაკის სპრეის შეძენა. სწორედ მაშინ მივხვდი, რომ მხარდაჭერისა და პროტესტის გამოსახატად, ჩვენი სივრცე, ცეკვისა და ვარჯიშის გარდა, თავდაცვის ტექნიკების სწავლებისათვისაც უნდა დაგვეთმო. ეს ცოდნა უამრავ სიტუაციაში შეიძლება გამოგვადგეს — მით უმეტეს, როცა ვცხოვრობთ ქვეყანაში, სადაც, შესაძლოა, თმის ფერის ან ჩაცმულობის გამოც კი დაგესხან თავს", — ამბობს ლევიოსას დამფუძნებელი თამთა ჯაფარიძე.

ფოტო: ლევიოსა

პირველი უფასო გაკვეთილის შემდეგ, რომელზე დასწრებაც ნებისმიერ მსურველს შეუძლია, თავდაცვის ტექნიკების შესწავლა კურსისა და ექსპრეს გაკვეთილების სახით გაგრძელდება. იმისათვის, რომ ამ ძალიან საჭირო უნარების დაუფლება ყველასათვის ხელმისაწვდომი იყოს, კურსზე ფიქსირებული გადასახადი არ იმოქმედებს და მსურველებს დასწრება დონაციის გაღების საფუძველზე შეეძლებათ.

უფასო გაკვეთილისა და კურსის ფარგლებში მსურველები ისწავლიან თავდამსხმელების მოგერიებისა თუ განიარაღების ტექნიკებს, აგრეთვე, პრაქტიკაში გაითამაშებენ რეალობასთან მიახლოებულ სცენარებს, რაც მათ მეტ თავდაჯერებულობას შესძენს და ფიზიკურად თუ მორალურად გააძლიერებს. აღსანიშნავია ისიც, რომ თავდაცვის ტექნიკებთან ერთად ლევიოსა პირველადი სამედიცინო დახმარების გაკვეთილების დამატებასაც გეგმავს.

გაკვეთილებს საქართველოს, კავკასიისა და მსოფლიოს მრავალგზის ჩემპიონი და პრიზიორი, გოჯუ-რიო კარატე დოს მთავარი მწვრთნელი ბაკურ გაბუნია ჩაატარებს. აღსანიშნავია, რომ პანდემიის ფონზე, თითოეულ ჯგუფში ადამიანების რაოდენობა შეზღუდული იქნება და ბევრი მსურველის შემთხვევაში, დამსწრეთა უსაფრთხოების მიზნით, დამატებითი ჯგუფები შეიქმნება.

დასწრების მსურველებს გაკვეთილზე ჩასაწერად შეუძლიათ, ლევიოსას Facebook ან Instagram გვერდებზე მისწერონ ან დაუკავშირდნენ ტელეფონის ნომერზე: 598 46 22 45.