პარტია საქართველოსთვის ლიდერის, გიორგი გახარიას განცხადებით, LGBT მემორანდუმი, რომელსაც 15-მა პარტიამ მოაწერა ხელი, "პოლიტიკური კეკლუცობაა" და ამიტომ არ შეუერთდებიან.

"ამის უკან ვერაფერს შინაარსობრივს ან კონკრეტულ მიზნისთვის გადადგმულ ნაბიჯს ვერ ვხედავთ. მსგავსი, უაღრესად მნიშვნელოვანი, საქართველოს მოქალაქეებისთვის სენსიტიური და მგრძნობიარე საკითხის აი, ასე, პოლიტიკურად პიარი, მიმაჩნია, რომ არაგონივრულია, არასწორია", — განაცხადა მან.

16 მაისს Tbilisi Pride-მა LGBT უფლებების შესახებ 15 პარტიასთან თანამშრომლობა დაიწყო და საერთო დოკუმენტს მოაწერა ხელი. 15 პოლიტიკური გაერთიანება შეთანხმდა, რომ თითოეული მათგანი, მათ ხელთ არსებული ყველა მექანიზმის გამოყენებით იბრძოლებს ქვიარ ადამიანების მიმართ დისკირმინაციისა და ძალადობის აღმოსაფხვრელად, დაიცავს თითოეული მოქალაქის შეკრებისა და გამოხატვის თავისუფლებას განურჩევლად სექსუალური ორიენტაციისა და გენდერული იდენტობისა. ამასთან, არ დაუშვებს პოლიტიკურ პროცესში ჰომოფობიის ნიადაგზე სოციალური შუღლის გაღვივებასა და სიძულვილის ენის გამოყენებას.