მებაღე ზურაბ შევარდნაძე სოციალურ ქსელში წერს, რომ ბოლო ორ დღეში ტურისტებისთვის გასაქირავებელი ოთახის ოთხი ჯავშანი გაუუქმდა.

"ახალგაზრდა ოჯახმა ავსტრიიდან, ზალცბურგიდან რომლებმაც 11 მაისს დაგვიკვეთეს ოთახი მოკლე წერილი გამოგვიგზავნეს, სამი ბოდიშით. დიასახლისს, რომელთანაც ჰქონდათ ურთიერთობა, წერენ: "ქეთევან, საქართელოში სამოგზაუროდ ჩამოსვლას, დიდი ხანია ვგეგმავდით, ძალიან გვიხაროდა და ვემზადებოდით.
კადრები, რომელიც ვნახეთ გვაშინებს და ამ ეტაპზე გადავწყვიტეთ თავი შევიკავოთ.
ბოდიში, ბოდიში, ბოდიში." დანარჩენმა სამმა სტუმარმა ბოდიშიც არ მოიხადა, უბრალოდ გააუქმა ჯავშანი. წერტილი...", — წერს შევარდნაძე.

შევარდნაძე On.ge-სთან საუბარში ამბობს, რომ დაზუსტებით არ შეუძლია თქმა რა კადრები ნახეს მისმა სტუმრებმა, თუმცა აღნიშნავს, რომ გაწბილებულია მომხდარი ფაქტით.

ჯავშნების გაუქმების შედეგად მიღებულ ზარალზე საუბრისას, შევარდნაძე ასე გვპასუხობს:

"ზარალი დიდად არ გვაწუხებს. უფრო ის, რომ ასე ვჩანვართ, ასე ველურად მსოფლიოში".

შევარდნაძის თქმით, თავისუფალი ოთახი უკვე გაქირავდა და ასევე დაჯავშნილია მომდევნო თვეების განმავლობაშიც. მოლოდინი, რომ შესაძლოა იგივე მიზეზით სხვა ტურისტებმაც გააუქმონ ჯავშანი, არ აქვს.

გაიგე მეტი:

5 ივლისს, თბილისში, ხეთაგუროვის ქუჩაზე პოლონელი ტურისტი დაჭრეს. თვითმხილველმა On.ge-ს უთხრა, რომ დაპირისპირების მიზეზი ტურისტის მიერ საყურის ტარება გახდა. მოგვიანებით, შსს-მ გაავრცელა განაცხადა, რომ ბრალდებულს, რომელსაც ამჟამად აღკვეთის ღონისიძიების სახით პატიმრობა აქვს შეფარდებული, ფსიქიკური ჯანმრთელობის პორბლემები აქვს. შინაგან საქმეთა მინისტრის მოადგილემ, ალექსანდრე დარახველიძემ გამორიცხა, რომ ტურისტის დაჭრა შესაძლოა ამავე დღეს დაგეგმილ ღირსების მარშთან ყოფილიყო დაკავშირებული.

ღირსების მარშის საწინააღმდეგოდ, ჰომოფობიურმა და ძალადობრივმა ჯგუფებმა აქციები გამართეს. 5-6 ივლისს ჯამში 50-ზე მეტ ჟურნალისტს, სამოქალაქო მოძრაობების ოფისებსა და მშვიდობიან მოქალაქეებს დაესხნენ თავს. ამ მოვლენების გამო სამოქალაქო საზოგადოებისა და ოპოზიციის ნაწილი შინაგან საქმეთა მინისტრის პასუხისმგებლობის საკითხის დაყენებას ითხოვს, რადგან მიაჩნიათ, რომ მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.