პანდების მოყვარულებისთვის ჩინეთი სასიამოვნო ინფორმაციას ავრცელებს. როგორც აღმოჩნდა, ველურ ბუნებაში ამ ეტაპზე 1 800 პანდა ცხოვრობს და ისინი გადაშენების პირას აღარ არიან, მაგრამ მიუხედავად ამისა მათი რაოდენობა მაინც მცირეა.

ჩინეთის გარემოს დაცვის მინისტრის განცხადებით, ქვეყნის მთავრობა დიდი ხანია ცდილობს პანდებს უკეთესი გარემო შეუქმნას, სწორედ ამის შედეგია მათი რაოდენობის ზრდა.

ისინი დიდი ხნის განმავლობაში იკვლევდნენ მათ პირობებს და ბამბუკის ტყეები ხელახლა გააშენეს, რათა პანდებს გადარჩენისთვის აუცილებელ პირობებში ეცხოვრათ.

ფოტო: giphy

პანდების გარდა აზიური სპილოების, ციმბირული ვეფხვებისა და ამურის ლეოპარდების რაოდენობაც საგრძნობლად გაზრდილია.

სოციალურ ქსელებში ეს ინფორმაცია სწრაფად გავრცელდა და პოზიტიური დამოკიდებულება გამოიწვია.

"ძალიან კარგი ამბავია, როგორც ჩანს შრომამ შედეგი გამოიღო, მაგრამ ეს მხოლოდ დასაწყისია. ცხოველები ჯერ კიდევ საფრთხის წინაშე არიან, ასე რომ ახლა მოდუნების დრო არ არის', — წერს ერთ-ერთი მომხმარებელი.

ციმბირული ვეფხვი

ფოტო: Leipzig Zoological Garden

ცხოველთა შენარჩუნების პროგრამა წლების წინ დაიწყო. ექსპერტები ამ პროგრამის პოპულარობას და შედეგიანობას პეკინის დიპლომატიურ პოლიტიკასთან აკავშირებენ. როგორც ქვეყნის საგარეო საქმეთა მინისტრმა თქვა, ბოლო პერიოდში, ჩინეთის მოსახლეობისთვის სუფთა ჰაერი და სასმელი წყალი ისეთივე ღირებული გახდა როგორც ოქრო და ვერცხლი.

"ჩვენ მზად ვართ ვითანამშრომლოთ სხვა ქვეყნის წარმომადგენლებთანაც, რათა ერთად ვიბრძოლოთ ჩვენი გარემოს გადასარჩენად", — განაცხადა მან.

თუმცა პანდები ჯერ კიდევ საფრთხის წინაშე არიან, რადგან კლიმატის ცვლილებამ შეიძლება გაანადგუროს ბამბუკის ტყის 35 %, რაც იმას ნიშნავს, რომ ცხოველებისთვის საცხოვრებელი ადგილები საგრძნობლად შემცირდება.