სამეზობლო პოლიტიკისა და გაფართოების საკითხებში ევროკომისრის, ოლივერ ვარჰეის განცხადებით, საქართველოს მისცემენ საშუალებას, რამდენიმე ეტაპს "გადაახტეს" და პირდაპირ იმ ეტაპზე შემოუერთდეს, რაც ახლა ევროკავშირშია. ევროკომისრის თანახმად, ამ გეგმით ქვეყანა მინიმუმ 3,9 მილიარდი ევროს ინვესტიციის მოზიდვას შეძლებს.

ამის შესახებ ვარჰეიმ საქართველოს პრემიერმინისტრ ირაკლი ღარიბაშვილთან ერთობლივ პრესკონფერენციაზე ისაუბრა. მისი თქმით, ღარიბაშვილთან საუბრის შემდეგ და დაადგინა, რომ მთავარი დაბრკოლება და სისუსტე ეკონომიკასა და საზოგადოებაში დაკავშირებადობის ცნების არ ქონაა.

"იქნება ეს გზები, რკინიგზა, იქნება ეს გამოუყენებელი პოტენციალი, რაც შავი ზღვის რეგიონში არსებობს, თუ იქნება ეს დაკავშირებადობა მთავარ ელექტრო და ინტერენეტ-ქსელებთან, ყველა ეს ასპექტი დიდი პოტენციალის მქონეა და შეუძლია საქართველოს ეკონომიკა წინ წაიყვანოს და ახალ განზომილებაში გარდაქმნას. სწორედ ამიტომ, ჩვენ შევიმუშავეთ გეგმა, რომლითაც დაკმაყოფილდება ეს გამოწვევა, — განაცადა ოლივერ ვარჰეიმ.

მისივე თქმით, დაკავშირებადობა შეიქმნება ეკონომიკის გაძლიერების, მცირე და საშუალო საწარმოების გაძლიერების, ადგილობრივი თემების გაძლიერების სახით, გაუმჯობესდება წვდომა ციფრულ სერვისებზე მთელ ქვეყანაში და ასევე, საქართველო მათ ახალ მწვანე კონცეფციასა და მათ მეგობრებს წარედგინება.

"საქართველოს მივცემთ საშუალებას, რომ რამდენიმე ეტაპს "გადაახტეს" და პირდაპირ შემოგვიერთდეს იმ ეტაპზე, რაც ახლა არის ევროკავშირში. ამ გეგმით საქართველო მინიმუმ 3,9 მილიარდი ევროს ინვესტიციის მოზიდვას შეძლებს. ეს არის ერთი მესამედი იმისა, რაც ქვეყანას მშვიდობის პერიოდში, კოვიდის კრიზისამდე ჰქონდა მთლიანი შიდა პროდუქტის სახით. ეს არის აზრიანი, დიდი პაკეტი დახმარებისა, თუმცაღა ეს არის უშველებელი ამოცანა ყველა ჩვენგანისთვის. ესაა შესაძლებლობა და ჩვენ ერთად მოგვიწევს მუშაობა, ძალიან დიდი შრომა მოგვიწევს, რომ ეს ყველაფერი პრაქტიკაში დავნერგოთ", — აღნიშნა მან.

ვარჰეის განცხადებით, საქართველოს პრემიერმინისტრთან, ასევე, იმ ძლიერ სტრუქტურებზეც ისაუბრა, რომელიც ამ პროგრამის განხორციელებისთვის საქართველოს სჭირდება.

"მიგვაჩნია, რომ ეს პროექტები შეძლებენ ცვლილების განხორციელებას ადგილზე, ქვეყნის მოქალაქეებისთვის, დღეიდან, მომდევნო 5 წლის განმავლობაში და რეალობა ქვეყანაში შეიცვლება იმ ხალხისთვის, ვისაც უნდა ვაჭრობა, საქმის წარმოება, მუშაობა, სწორი უნარ-ჩვევების მიღება, ყველაფერი ეს იქნება აბსოლუტუტსად განსხვავებული დღევანდელი დღისგან, ძალიან მსგავსი იმისა, რაც ჩვენ ევროკავშირში გაგვაჩნია", — აღნიშნა ვარჰეიმ.